Máskeý Qazaqstan mektepterine muǵalim jiberýge daıyn ekenin jetkizdi, dep habarlaıdy "Adyrna" tilshisi Russkiymir.ru-ǵa siltep.
Reseı bıligi orys tilin ilgeriletý maqsatynda orys tili jáne basqa da pán muǵalimderin Qazaqstan mektepterine jiberýge daıyn ekenin aıtty.
Alǵashqy saparyn Reseıden bastaǵan QR Úkimet basshysy Oljas Bektenov 4 naýryz kúni Reseıdiń úkimet úıinde boldy.
Reseı premerimen kezdesken Oljas Bektenov gýmanıtarlyq yntymaqtastyq jáne Qazaqstanda orys tilin ilgeriletý máselelerin talqylady. Reseı úkimetiniń basshysy eki memleket tyǵyz mádenı jáne gýmanıtarlyq qatynastarmen baılanysty ekenin atap ótti.
Odan bólek bilim salasynyń mamandary da júzdesti. Reseıdiń Oqý-aǵartý mınıstriniń orynbasary Denıs Grıbov pen Qazaqstan Respýblıkasynyń Oqý-aǵartý mınıstriniń birinshi orynbasary Natalıa Jumadildaevanyń kezdesýinde Reseıdiń Qazaqstan pedagogtarynyń biliktiligin arttyrýǵa qatysty birqatar máselesi talqylandy.
Kezdesý barysynda "kásipqoılyq" federaldyq jobasyn iske asyrýdaǵy reseılik tájirıbeni zerdeleýdiń nátıjesinde kásiptik bilim berý salasyndaǵy yntymaqtastyq máseleleri qozǵaldy. Reseı tarapy orys tili men orys tilindegi oqý pánderiniń muǵalimderin Qazaqstan mektepterine jiberýdi usyndy.
Sóz sońynda Mıhaıl Mıshýstın qazaqstandyq tarapqa orys tilin damytyp jatqany úshin rızashylyǵyn bildirdi.
Alaıda áleýmettik jelide bul jańalyqty ájýaǵa aınaldyrǵandar kóp. Jeli qoldanýshylary: "Olarǵa erik berseń Úkimetin de Qazaqstanǵa kóshirip ákeledi", "Reseıdiń "qamqorlyǵynan" shyǵa almaıtyn boldyq qoı", "biz odan da óz ana tilimizdi úıreneıik" "Biz orys tilin qazaq tilinen de jaqsy bilemiz", "Men orys tili pániniń muǵalimimin. Biraq jumysqa kire almaı júrmin. Mektepke ornalasý úshin para berý kerek" dep óz pikirin jarysa jazyp jatyr.
