“وتانعا وپاسىزدىق جاسادى” دەگەن ايىپپەن 10 جىلعا سوتتالعان قازاقستاندىق بەلگىلى سينولوگ كونستانتين سىروەجكيننىڭ شارتتى تۇردە مەرزىمىنەن بۇرىن بوساتۋ وتىنىمىنەن باس تارتىلعاننان كەيىن ول پرەزيدەنت قاسىم-جومارت توقاەۆتىڭ بارلىق يگى باستامالارىنا سابوتاج جاسالىپ جاتقانىن ايتتى. بۇل تۋرالى Zona KZ جازدى، دەپ حابارلايدى “ادىرنا” ۇلتتىق پورتالى.
«پرەزيدەنت ق.ق.توقاەۆتىڭ بارلىق يگى باستامالارىنا توسقاۋىل قويىلدى (سابوتاج جاسالدى) نەمەسە مۇلدەم كەرىسىنشە جۇزەگە اسىرىلۋدا»، - دەپ جازدى سىروەجكين ينتەرنەت-گازەت رەداكتورىنا جازعان حاتىندا.
شارتتى تۇردە مەرزىمىنەن بۇرىن بوساتۋ ءوتىنىمى قولداۋ تاپپاعاننان كەيىن ول باس پروكۋرور بەرىك اسىلوۆقا قوناەۆ سوتى مەن الماتى وبلىستىق سوتىنىڭ سوتتالعانداردىڭ شارتتى تۇردە مەرزىمىنەن بۇرىن بوساتۋ تۋرالى وتىنىشتەرىن قاناعاتتاندىرۋدان باس تارتۋ قاۋلىلارىنىڭ زاڭدىلىعىن باعالاۋدى، سونداي-اق ىستەردى قاراۋعا قاتىساتىن پروكۋرورلاردىڭ قىزمەتىن باعالاۋ جانە ولاردىڭ شەشىمدەرىنىڭ كونستيتۋتسياعا جانە «پروكۋراتۋرا تۋرالى» زاڭعا سايكەستىگىن انىقتاۋدى سۇراپ جۇگىنگەن.
ايتا كەتەيىك، بۇعان دەيىن كونستانتين سىروەجكين قاسىم-جومارت توقاەۆتان راقىمشىلىق جاساۋدى سۇراعانىن جازعان ەدىك.
ەسكە سالايىق، 2019 جىلى كونستانتين سىروەجكين قىلمىستىق كودەكستىڭ 175-بابىنىڭ 1-ءبولىمى «مەملەكەتكە وپاسىزدىق جاساۋ» بويىنشا كىنالى دەپ تانىلعان ەدى. ول — قىتايتانۋشى عالىم، كوپتەگەن كىتاپتىڭ، سونداي-اق ورىس، اعىلشىن جانە قىتاي تىلدەرىندەگى مىڭنان اسا ماقالانىڭ اۆتورى. زەرتتەۋشى ۇزاق جىلدار بويى قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋ ينستيتۋتىنىڭ باس عىلىمي قىزمەتكەرى جۇمىسىن اتقاردى.
ونىڭ كىتاپتارى: «قىتايداعى قازاقتار: الەۋمەتتىك-ەكونوميكالىق جانە مادەني دامۋ وچەركتەرى»، «قازىرگى شىڭجاڭ جانە ونىڭ قازاق-قىتاي قاتىناستارىنداعى ورنى»، «قازاقستان-قىتاي: شەكارالىق ىنتىماقتاستىقتان ستراتەگيالىق سەرىكتەستىككە»، «قازاقستان قىتايدان قورقۋ كەرەك پە: ميفتەر مەن فوبيالار».
