وتكەن عاسىردىڭ سەكسەنىنشى جىلدارىنىڭ سوڭى. پىكىرلەردىڭ ارالۋاندىعى دەگەن كەڭشىلىك بەرىلگەن. بىراق تالايلار سونى بارىنشا پايدالانا المايتىن. سەبەبى جۇرتتىڭ ءبارى بىردەي ويلايتىن. بىرنەشە ونداعان جىل سانانى قۇرساۋلاعان قالىپتى قيراتۋ اركىمگە وڭايعا تۇسپەيتىن.
پىكىر ارالۋاندىعىنا ەسىك اشىلعانعا دەيىن-اق جالپى قاۋىم قابىلداعان ۇسىنىس، شەشىم، ءتىپتى كۇدىكپەن قارايتىن ءبىر ازامات بولدى. ءبىزدىڭ ارامىزدا، سق-دا قىزمەت ىستەيتىن جۋرناليستەر ورتاسىندا. ول - قۋانبەك بوقاەۆ. نە نارسەگە بولسىن “جوق، ولاي ەمەس” دەپ شىعاتىن. ءارى ءوزىنىڭ كەرىسىنشە، قارسى ويىن ايتاتىن. جاي ايتپايتىن، جۇرتشىلىق باس شۇلعىپ، قولداپ وتىرعان نارسەنىڭ تۋ-تالاقايىن شىعارىپ بەرەتىن.
سول قۋانبەك اعا ومىردەن ءوتىپتى. ءدال وسىلاي “جوق، ولاي ەمەس” دەي العان ەكىنشى اعا دا و دۇنيەلىك بولعانىن ەستىپ، كوڭىل تاعى قۇلازىدى. ول - سەيداحمەد قۇتتىقادام. بۇل كىسى سوناۋ 1994 جىلى نازارباەۆتىڭ شەكسىز بيلىگىنە مۇمكىندىك بەرگەن كونستيتۋتسيا جوباسىنا قارسى شىققان.
ەندى قالام ۇستاعان جۋرناليستەر اراسىنان قۋانبەك پەن سەيداحمەت اعالار سياقتى بيلىككە “جوق، ولاي ەمەس!” دەپ جازا الاتىندار شىعار ما ەكەن؟..
قاينار ولجاي