بۇگىن – قازاق حالىق پوەزياسىنىڭ ايگىلى تۇلعاسى، ولەڭ ءسوزدىڭ ءدۇلدۇلى، جىراۋ، جىرشى جامبىل جاباەۆتىڭ دۇنيەگە كەلگەن كۇنى. اقىننىڭ تۋعانىنا 178 جىل تولىپ وتىر.
جامبىل جاباەۆ 1846 جىلعى اقپان ايىنىڭ 28-ءى كۇنى جامبىل وبلىسىنداعى جامبىل تاۋىنىڭ ەتەگىندە دۇنيەگە كەلگەن. جامبىلدىڭ اقىندىق دارىنى جاس كەزىنەن-اق تانىلا باستاعان. بوزبالا شاعىنان ورتاسىن ءان مەن جىرعا كەنەلتىپ، كورشىلەس قىرعىز ەلىنە دە داڭقى جايىلعان. سول كەزدە جامبىل جەتىسۋدىڭ ءدۇلدۇل اقىنى سۇيىنبايعا جولىعىپ، ونىڭ باتاسىن الادى.
جامبىل “شاعىم”، “جىلقىشى”، “شابدەنگە”، ء“سات سايلاناردا”، “وستەپكەدە”، “پاتشا ءامىرى تارىلدى”، ء“زىلدى بۇيرىق” سياقتى ولەڭىندە ەلدىڭ الەۋمەتتىك ساياسي ءومىرىن كورسەتكەن. جامبىل ولەڭدەرى الەمنىڭ بارلىق تىلدەرىنە اۋدارىلعان جانە جاريالانعان. جامبىلدىڭ «لەنينگرادتىق ورەنىم» اتتى اتاقتى ولەڭى ەشقاشان ۇمىتىلمايدى. جامبىل كوزىنىڭ تىرىسىندە كسرو مەملەكەتتىك سىيلىعىنىڭ لاۋرەاتى اتانعان.
جامبىلدىڭ ۇلىلىعى ونىڭ تەك اقىندىق شەبەرلىگىمەن عانا ەمەس، سونىمەن بىرگە، حالىق پوەزياسىنىڭ بۇتاق جايعان جاڭا ءبىر بايتەرەگى بولۋىمەن، باسقاشا ايتقاندا، حالىق اقىندارىنىڭ جاسامپازدىق رۋحتاعى جاڭا ۇلى كوشىن باستاعان دارالىعىمەن دە ولشەنەدى. ونىڭ سوزدەرى ۇرانعا اينالىپ، ءوزى حالىق پوەزياسىنىڭ اتاسى اتاندى.
ول 1945 جىلعى ماۋسىم ايىنىڭ 22-ىندە الماتى وبلىسىنىڭ ۇزىناعاش ەلدى مەكەنىندە 99 جاسىندا دۇنيەدەن ءوتتى.
