قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين لۋدومانيا، قۇمار ويىندارىنىڭ جاستار مەن ەلىمىزدىڭ ۇلتتىق قاۋىپسىزدىگىنە قاتەر توندىرە باستاعانى تۋرالى ايتتى، دەپ حابارلايدى “ادىرنا” ۇلتتىق پورتالى.
بۇل تۋرالى مەملەكەتتىك كەڭەسشى 26 اقپانداعى قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ وتىرىسىندا ءسوز ەتتى.
ونىڭ ايتۋىنشا، الەۋمەتتىك زەرتتەۋ بويىنشا، ءاربىر بەسىنشى ادام لۋدومانيا دەرتىنە شالدىققان، سونداي-اق ەلدەگى اجىراسۋلاردىڭ باسىم بولىگىنە وسى قۇمار ويىندارى سەبەپ بولىپ وتىر.
وسى ماسەلەگە قاتىستى مەملەكەتتىك كەڭەسشى قۇمار ويىندارى مەن ويىن بيزنەسىنە قارسى جوسپار ازىرلەنىپ جاتقانىن، جۇمىس بارىسى تولىق باقىلاۋدا بولاتىنىن حابارلادى.
“وسى جوسپاردى تولىقتاي اياعىنا دەيىن جەتكىزۋدى تاپسىرامىن. قۇجات قابىلدانعاننان كەيىن، جۇمىس بارىسى قالاي ورىندالىپ جاتىر – ءبارى قاداعالاناتىن بولادى. بۇل ءبىزدىڭ سوڭعى كەزدەسۋىمىز ەمەس. ءبىز سىزدەرمەن تۇراقتى تۇردە كەزدەسىپ تۇراتىن بولامىز. سوندىقتان بۇل قۇجاتتىڭ قابىلدانۋىن ءبىز ءوز باقىلاۋىمىزعا الامىز”، - دەپ ناقتىلادى ەرلان قارين.
“ادىرنا” ۇلتتىق پورتالى
