استانا اكىمى قوعامدىق كولىكتە ءجۇرۋ قۇنىنىڭ قىمباتتايتىنىن ايتتى، دەپ حابارلايدى "ادىرنا" ءتىلشىسى.
بۇل جاڭالىقتى قالا مەرى جەڭىس قاسىمبەك «سارىارقا» اۋدانىنىڭ تۇرعىندارىمەن كەزدەسۋ كەزىندە ايتتى.
شەنەۋنىكتىڭ سوزىنە قاراعاندا، ەسكى باعا 10 جىل بۇرىن بەكىتىلگەن.
2023 جىلى 900 اۆتوبۋس بولسا، قازىر ولاردىڭ سانى 1300-گە جەتكەن. ياعني، ءبىز اۆتوبۋستار سانىن شامامەن 40% ارتتىردىق. بيىل تاعى 300 اۆتوبۋس كەلەدى. نەگىزى حالىق سانى 1,5 ملن بولسا، قىزمەت كورسەتەتىن اۆتوبۋستار سانى 2 مىڭنان اسۋى كەرەك. سوندىقتان ءبىز بۇل ماسەلەنى تەزدەتىپ شەشۋگە تىرىسىپ جاتىرمىز. باعاعا كەلسەك، 90 تەڭگەلىك جول اقىسى 2014 جىلى بەكىتىلگەن. 10 جىل ءوتتى. وسى ارالىقتا جانارماي، گاز، اۆتوبۋس جۇرگىزۋشىلەرىنىڭ جالاقىسى ءوستى. ولاردىڭ ايلىعى قازىر 500-600 مىڭ تەڭگەنى قۇرايدى. بىزدە اۆتوبۋس جۇرگىزۋشىلەرىنىڭ جەتىسپەۋشىلىگى بار، مۇنداي ايلىققا كاسىبي مامانداردى جەتكىلىكتى مولشەردە جالداي الماي جاتىرمىز، - دەدى اكىم.
اكىم تۇرعىندار ءۇشىن جولاقىنى مەملەكەت تولەپ وتىرعانىن دا ەسەپتەدى.
ءبىر جولاۋشىنىڭ ءجۇرۋ اقىسى، ەگەر ەلەكترواۆتوبۋس بولسا، 400-500 تەڭگەنى، گاز نە ديزەلمەن جۇرەتىن اۆتوبۋس بولسا، 240-400 تەڭگەنى قۇرايدى، ياعني اكىمدىك ءار ازامات ءۇشىن 200 تەڭگە قوسىمشا تولەپ وتىر. مەنىڭشە، 110 تەڭگە – بۇل 7-10 جىل بۇرىن كوتەرىلۋى ءتيىس باعا. بىرىنشىدەن، 10 جىل بۇرىنعى تاريف قازىر وزەكتى ەمەس، سوندىقتان مۇنداي قادامعا بارۋعا ءماجبۇرمىز، - دەدى اكىم.
ەسكە سالا كەتەيىك، بىرنەشە كۇن بۇرىن قوعامدىق كولىككە سىيماي، ەسىكتەن قۇلاعان ايەلدىڭ ۆيدەوسى تاراپ ەدى.
