Astana ákimi qoǵamdyq kólikte júrý qunynyń qymbattaıtynyn aıtty, dep habarlaıdy "Adyrna" tilshisi.
Bul jańalyqty qala meri Jeńis Qasymbek «Saryarqa» aýdanynyń turǵyndarymen kezdesý kezinde aıtty.
Sheneýniktiń sózine qaraǵanda, eski baǵa 10 jyl buryn bekitilgen.
2023 jyly 900 avtobýs bolsa, qazir olardyń sany 1300-ge jetken. Iaǵnı, biz avtobýstar sanyn shamamen 40% arttyrdyq. Bıyl taǵy 300 avtobýs keledi. Negizi halyq sany 1,5 mln bolsa, qyzmet kórsetetin avtobýstar sany 2 myńnan asýy kerek. Sondyqtan biz bul máseleni tezdetip sheshýge tyrysyp jatyrmyz. Baǵaǵa kelsek, 90 teńgelik jol aqysy 2014 jyly bekitilgen. 10 jyl ótti. Osy aralyqta janarmaı, gaz, avtobýs júrgizýshileriniń jalaqysy ósti. Olardyń aılyǵy qazir 500-600 myń teńgeni quraıdy. Bizde avtobýs júrgizýshileriniń jetispeýshiligi bar, mundaı aılyqqa kásibı mamandardy jetkilikti mólsherde jaldaı almaı jatyrmyz, - dedi ákim.
Ákim turǵyndar úshin jolaqyny memleket tólep otyrǵanyn da eseptedi.
Bir jolaýshynyń júrý aqysy, eger elektroavtobýs bolsa, 400-500 teńgeni, gaz ne dızelmen júretin avtobýs bolsa, 240-400 teńgeni quraıdy, ıaǵnı ákimdik ár azamat úshin 200 teńge qosymsha tólep otyr. Menińshe, 110 teńge – bul 7-10 jyl buryn kóterilýi tıis baǵa. Birinshiden, 10 jyl burynǵy tarıf qazir ózekti emes, sondyqtan mundaı qadamǵa barýǵa májbúrmiz, - dedi ákim.
Eske sala keteıik, birneshe kún buryn qoǵamdyq kólikke syımaı, esikten qulaǵan áıeldiń vıdeosy tarap edi.
