وقۋ-اعارتۋ ءمينيسترى عاني بەيسەمباەۆ مەكتەپ سەكىلدى مەكەمەدە ناماز وقىعان وقۋشىلارعا بايلانىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ۇكىمەت وتىرىسىنان كەيىن جۋرناليستەر «قاتەلەسپەسەم شىمكەنت قالاسى اكىمىنىڭ ورىنباسارى (سارسەن قۇرانبەك – سج) «قۇرمەتتى يمامدار، سىزدەردەن وتىنەمىن، ءالى بۋىنى قاتپاعان جاس بالانى مەشىتكە شاقىرماڭىزدارشى» دەپ ايتىپ ەدى. جالپى وسىنداي تەندەنتسيا قالىپتاسقانىن بايقايمىز. وقۋ-اعارتۋ ءمينيسترى بالالاردى اعارتۋعا ەمەس، قارايتۋعا جۇمىس ىستەپ جاتقان جوق پا؟ وقۋشىلاردىڭ مەشىتكە بارۋى نەگە كوبەيىپ كەتتى؟» دەپ سۇراق قويدى.
"جالپى وقۋ-اعارتۋ مينيسترلىگىنىڭ نەگىزگى باستى ماقساتى ءبىزدىڭ بالالارىمىزعا ساپالى ءبىلىم مەن سانالى تاربيە بەرۋ ەكەنىن مەن ۇنەمى ايتىپ ءجۇرمىن. سوندىقتان دا بارلىق جۇمىس تيىسىنشە ءبىزدىڭ بالالارىمىزدىڭ وسى باعىتتاعى ماسەلەنى شەشۋدەگى ءىس-شارالار قابىلداپ جاتىرمىز. ال ەندى جەكەلەگەن وڭىرلەردەگى كەيبىر ماسەلەلەر بۇكىل وقۋ-اعارتۋ سالاسىنداعى بالالاردى قارايتۋعا باعىتتالىپ جاتىر دەپ ايتۋعا بولمايدى. ءبىز كەز كەلگەن ماسەلەنى لوكالدى تۇردە شىققان جەرىندە انىقتاپ، بۇل باعىتتا ءتيىستى جۇمىستار جۇرگىزىپ وتىرمىز. قازىر ءوزىڭىز بىلەسىز، 1 قىركۇيەكتەن باستاپ ءبىرتۇتاس تاربيە باعدارلاماسى قابىلداندى. بالالاردىڭ تۇلعا بولىپ قالىپتاسۋىنا باعىتتالعان ۇلكەن ءىس-شارالار ۇيىمداستىرىلىپ جاتىر. سوندىقتان بۇل جەردە تيىسىنشە بالالاردىڭ ساپالى ءبىلىم الۋىنا بارلىق جاعداي جاساپ جاتىرمىز", – دەدى مينيستر
