Oqý-aǵartý mınıstri Ǵanı Beısembaev mektep sekildi mekemede namaz oqyǵan oqýshylarǵa baılanysty pikir bildirdi, dep habarlaıdy "Adyrna" ulttyq portaly.
Úkimet otyrysynan keıin jýrnalıster «Qatelespesem Shymkent qalasy ákiminiń orynbasary (Sársen Quranbek – SJ) «Qurmetti ımamdar, sizderden ótinemin, áli býyny qatpaǵan jas balany meshitke shaqyrmańyzdarshy» dep aıtyp edi. Jalpy osyndaı tendenııa qalyptasqanyn baıqaımyz. Oqý-aǵartý mınıstri balalardy aǵartýǵa emes, qaraıtýǵa jumys istep jatqan joq pa? Oqýshylardyń meshitke barýy nege kóbeıip ketti?» dep suraq qoıdy.
"Jalpy oqý-aǵartý mınıstrliginiń negizgi basty maqsaty bizdiń balalarymyzǵa sapaly bilim men sanaly tárbıe berý ekenin men únemi aıtyp júrmin. Sondyqtan da barlyq jumys tıisinshe bizdiń balalarymyzdyń osy baǵyttaǵy máseleni sheshýdegi is-sharalar qabyldap jatyrmyz. Al endi jekelegen óńirlerdegi keıbir máseleler búkil oqý-aǵartý salasyndaǵy balalardy qaraıtýǵa baǵyttalyp jatyr dep aıtýǵa bolmaıdy. Biz kez kelgen máseleni lokaldy túrde shyqqan jerinde anyqtap, bul baǵytta tıisti jumystar júrgizip otyrmyz. Qazir ózińiz bilesiz, 1 qyrkúıekten bastap birtutas tárbıe baǵdarlamasy qabyldandy. Balalardyń tulǵa bolyp qalyptasýyna baǵyttalǵan úlken is-sharalar uıymdastyrylyp jatyr. Sondyqtan bul jerde tıisinshe balalardyń sapaly bilim alýyna barlyq jaǵdaı jasap jatyrmyz", – dedi mınıstr
