اقمولا وبلىسىندا ماس كۇيىندە كولىك جۇرگىزگەنى ءۇشىن قاماۋعا الىنعان اكىم، جۇرگىزۋشى كۋالىگىنەن ايىرىلدى، دەپ حابارلايدى "ادىرنا" ۇلتتىق پورتالى.
«ۆيكتور الەكساندروۆيچ رۋكاۆيشنيكوۆ 608-باپتىڭ 1-بولىگىندە (جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ) كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلسىن. قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 15 تاۋلىككە اكىمشىلىك قاماققا الۋ جانە كولىك قۇرالىن باسقارۋ قۇقىعىنان جەتى جىل مەرزىمگە ايىرۋ تۇرىندەگى اكىمشىلىك جازاعا تارتىلسىن»، - دەلىنگەن زەرەندى اۋداندىق سوتىنىڭ قاۋلىسىندا.
بەلگىلى بولعانداي، ۆيكتوروۆسكي اۋىلدىق وكرۋگىنىڭ اكىمى ۆيكتور رۋكاۆيشنيكوۆ 17 اقپاندا ماس كۇيىندە Nissan Almera كولىگىنىڭ تىزگىنىنە وتىرعان. 17 اقپانداعى مەديتسينالىق ساراپتامانىڭ قورىتىندىسىنا سايكەس، رۋكاۆيشنيكوۆقا تاڭعى ساعات 1.51-دە جەڭىل دارەجەلى الكوگولدىك ماس كۇيدە كولىك جۇرگىزدى دەگەن قۇقىق بۇزۋشىلىق تاعايىندالعان.
سوت وتىرىسىندا رۋكاۆيشنيكوۆ ۆ.ا اكىمشىلىك قۇقىق بۇزۋشىلىق جاساعان كىناسىن تولىق مويىنداپ، جاساعان ارەكەتىنە وكىنەتىنىن ايتتى.
