پاۆلودار وبلىسىنىڭ بۇرىنعى اكىمى عالىمجان جاقيانوۆ الماتىدا وزىنە قاتىستى جاڭا ءىس قوزعالعانىن حابارلادى. بۇل تۋرالى ول الەۋمەتتىك جەلىدە جازدى، دەپ حابارلايدى “ادىرنا” ۇلتتىق پورتالى.
“وسىعان دەيىن تولەن توقتاسىنوۆ ەكەۋىمىزدىڭ ارامىزداعى ىسكەرلىك داۋدىڭ (ونىڭ باستاماسىمەن) قوعامدىق ورتاعا شىعىپ، ارتى سوت وتىرىستارىنا ۇلاسقانى تۋرالى جازعانمىن.
ماسەلەنىڭ قىسقاشا ءمان-جايى بىلاي: ءبىر كەزدەرى ءوز باسىنداعى قارىزدارىمەن قارجىلىق جاۋاپكەرشىلىكتى توقتاسىنوۆ ماعان جۇكتەۋگە تىرىستى. وكىنىشكە قاراي، ونىڭ بۇل ارەكەتكە بارۋىنا ۇزاق جىلعى دوستىعىمىزدى دا كەدەرگى بولا المادى. ول ماعان جالا جابۋمەن، ازاماتتىق سوتقا جۇگىنۋمەن شەكتەلمەدى. ماسەلەن، 2022 جىلى موڭعوليا پوليتسياسىنا مەنىڭ ۇستىمنەن ارىز جازدى. قۇقىق قورعاۋ ورگاندارى بارلىق ءمان-جايدى تەكسەرىپ، مەنى جاۋاپقا تارتۋعا نەگىز تاپپاي، كەرىسىنشە، توقتاسىنوۆتىڭ وزىنە قاتىستى قىلمىستىق ءىس قوزعادى. وسىدان كەيىن ول موڭعوليادان كەتۋگە ءماجبۇر بولدى. قازىر وعان ىزدەۋ سالىنعان”، دەپ جازدى ول.
سونداي-اق، جاقيانوۆتىڭ ايتۋىنشا، قازاقستان ازاماتتارى اراسىنداعى جەكە داۋعا قالا پروكۋرورىنىڭ ارالاسۋى مۇمكىن.
“كۇنى كەشە تاعى ءبىر جايت ەستىدىم. تولەن توقتاسىنوۆ بىلتىر الماتىنىڭ بوستاندىق اۋداندىق پوليتسياسىنا دا ءدال سونداي ارىزبەن جۇگىنىپتى. ونداعىلار دا مەنىڭ ءىس-ارەكەتىمدە قىلمىس قۇرامى بولماۋىنا بايلانىستى ماعان قاتىستى ءىس قوزعاۋدان باس تارتادى. الايدا بيىلعى جىلدىڭ 1 اقپانىندا الماتى قالاسى پروكۋرورى س.كارىپبەكوۆ ول شەشىمىنىڭ كۇشى جويىلىپ، توقتاسىنوۆتىڭ ارىزى بويىنشا تەرگەۋ باستالعانىن حابارلاپتى. وسىلايشا، «جاڭا ادىلەتتى قازاقستاندا» ماعان قارسى جاڭا قىلمىستىق ءىس قوزعالدى.
قازاقستان ازاماتتارى اراسىنداعى جەكە داۋعا قالا پروكۋرورىنىڭ ارالاسۋى كەم دەگەندە كۇمان تۋدىرادى. اسىرەسە، قر باس پروكۋرورىنىڭ پروكۋراتۋرا وكىلدەرىنە ىسكەرلىك داۋلارعا ارالاسۋعا تىيىم سالاتىن رەسمي نۇسقاۋى بار ەكەنىن ەسكەرسەك، بۇل مۇلدەم ويعا قونبايدى.
سوندىقتان وسى ىستە نە جەمقورلىق، نە ساياسي استارى بار دەپ سانايمىن. ەكەۋىنىڭ ناقتى قايسىسى ەكەنىن الداعى ۋاقىت كورسەتەر”، دەپ جازدى ول.
ايتا كەتەيىك، بۇعان دەيىن عالىمجان جاقيانوۆ تولەن توقتاسىنوۆ پەن ونىڭ جۇبايى الما توقتاسىنوۆانىڭ ۇستىنەن بىرنەشە رەت ارىز ءتۇسىرىپ، سوتتا جەڭىلىس تاپقان بولاتىن. ول تۋرالى “دوستار داۋى” دەگەن سەريالى ماقالالار جاريالادىق.
سونىمەن قاتار، تولەن توقتاسىنوۆتىڭ “ادىرنا” يۋتۋب ارناسىنا بەرگەن سۇحباتىنا عالىمجان جاقيانوۆ شاعىمدانىپ، الاتاۋ اۋداندىق سوتىنا تالاپ-ارىزبەن جۇگىنگەن بولاتىن. كەزەكتى سوت وتىرىسى 26 اقپان كۇنى بولادى.
