الماتىدا جەلتوقسانشىلار لگبت-عا قارسى اكتسيا وتكىزدى، دەپ حابارلايدى "ادىرنا" ءتىلشىسى.
"تاۋەلسىزدىك تاڭى" مونۋمەنتىنىڭ الدىنا جينالعاندار ەڭ اۋەلى الاڭدى تازالاۋ ماقساتىندا ادىراسپاندى تۇتەتىپ، الاستادى. جەلتوقسانشىلار تالاپ-تىلەكتەرىن ايتتى.
“1986 جەلتوقسان كوتەرىلىسىنىڭ كۇرەسكەرلەرى ەلىمىزدە تامىرىن جايىپ، وركەندەپ بارا جاتقان، قازاق ۇلتىنىڭ بۇگىنى مەن بولاشاعىنا قاتەر توندىرەتىن لگبت توپتارىنىڭ قاۋىپتى، ارسىز ارەكەتتەرىنە مەملەكەت تاراپىنان ارنايى زاڭ قابىلدانىپ، تىيىم سالىنعانىن جانە جازاعا تارتىلۋىن تالاپ ەتەمىز!”، – دەدى "جەلتوقسان 86" قوعامدىق قوزعالىسىنىڭ اتىنان سويلەگەن گۇلباحرام ءجۇنىس.
سونداي-اق بەلسەندىلەر 8 ناۋرىز مەرەكەسىنە وراي ميتينگ پەن شەرۋلەرگە رۇقسات بەرىلمەۋىن تالاپ ەتتى.
“بۇل اكتسيا قازاق قوعامى قانشالىقتى بولىنگەنىن كورسەتەدى. بۇل جەردى الاستاۋ ءۇشىن ادىراسپان دا اكەلىپتى. مەن ەندى وسى جەرگە كۇن سايىن كەلىپ تۇرۋعا ۋادە بەرەمىن. ماعان –قازاقستان ازاماتىنا، قازاق قىزىنا تۋعان جەرىمدە قالاعان جەرىمە بارۋىما ەشكىم تىيىم سالا المايدى”، – دەدى بەلسەندى جانار سەكەرباەۆا.
