«الاتاۋ» ءداستۇرلى ونەر تەاترىنىڭ قورجىنى تاعى ءبىر تاماشا تۋىندىمەن تولىقتى. ماملۇكتەر اراسىنان شىعىپ، XIII عاسىردا مىسىردى بيلەگەن تۇركى تەكتەس سۇلتان، ورتاعاسىرلىق مىسىردىڭ اسا ءىرى اسكەري جانە مەملەكەت قايراتكەرى بەيبارىس سۇلتاننىڭ 800 جىلدىق مەرەيتويىنا وراي تەاتردا «Mamluk. سۇلتان بەيبارىس» قويىلىمىنىڭ پرەمەراسى 7 اقپاندا ءوتتى.
ساۋنددرامانىڭ قويۋشى رەجيسسەرى فارحاد مولداعالي، پلاستيكا رەجيسسەرى شىرىن مۇستافينا، حورەوگرافى ادىلەت تامەنوۆ، كومپوزيتورى سەرىكجان ايتقاليەۆ، كوستيۋم سۋرەتشىسى الما سىرباەۆا، ساۋند-ديزاينەرى ديدار يساحان.
سپەكتاكلدە رەجيسسەر قىسقا ۋاقىت ىشىندە تۇركى تەكتى دەشتى قىپشاق قانداسى، قۇلدان سۇلتان شىعىپ، الىستاعى اراب ەلىندە تاق يەسى دارەجەسىنە جەتكەن ءال-مالىك از-زاكىر رۋح-اد-دين بەيبارىس ءال- بۋندۋكداري ءال-ساليحلي – سۇلتان بەيبارىستىڭ ءومىر جولىن، ماملۇك اسكەرىن باسقارىپ شايقاستاردا ەرلىگىمەن كوزگە ءتۇسىپ، مىسىر مەن سيريا ءامىرشىسى دارەجەسىنە جەتكەنىن سۋرەتتەۋگە تىرىسقان.
اتى اڭىزعا اينالعان بەيبارىستىڭ ءرولىن دارىندى اكتەر اسەت ەسجان تاماشا ورىنداپ شىعىپ، «مەن كىممىن؟» دەگەن سۇراققا جاۋاپ ىزدەگەن كەيىپكەردىڭ جان دۇنيەسىندەگى ارپالىسىن، تۋعان جەرگە دەگەن ساعىنىشىن كورەرمەن جۇرەگىنە تاماشا جەتكىزە الدى. اكتەر ساعىزباي قارابالين ءرولىن سومداعان ۇستازىنىڭ دا «قوش بول... قىپشاق بالا!» دەپ قوشتاسىپ، بەيبارىستىڭ سەزىم تولعانىسىن ودان ءارى تولقىتىپ جىبەرگەن ءساتى سپەكتاكل كۋلميناتسياسى بولدى دەسەك ارتىق ايتپايمىز.
قويىلىم الدىندا «الاتاۋ» ءداستۇرلى ونەر تەاترى ديرەكتورى ماقسات نۇراليەۆ، سپەكتاكل رەجيسسەرى فارحاد مولداعالي باق وكىلدەرىمەن كەزدەسىپ، سپەكتاكل جايلى تولىق اقپاراتپەن ءبولىسىپ، سۇراقتارىنا جاۋاپ بەردى. فارحاد مولداعالي جۋرناليستەرمەن سۇحباتتا قويىلىمعا تەاتر اكتەرلارى، بيشىلەرى جانە ۇلتتىق اسپاپتار ءانسامبلى تولىق قاتىسقانىن ايتتى. سونىمەن قاتار، رەجيسسەر الداعى ۋاقىتتا ساۋنددرامانى قازاقستاننىڭ باسقا دا وڭىرلەرىندە قويىپ، ءتىپتى مىسىر استاناسى كايرگە دە شىعارۋ جوسپارىمىز بار دەگەن ويىمەن ءبولىستى.
پرەمەرانى تاماشالاۋعا زيالى قاۋىم وكىلدەرى قاتىسىپ، ءبىر ايتا كەتەتىنى، قويىلىمعا ارنالعان بيلەتتەردىڭ ءبارى ساتىلىپ كەتكەن.
ەكى كۇن قاتارىنان قويىلعان سپەكتاكل، اكتەرلاردىڭ ساحنالىق كيىمى، رەكۆيزيتتەر جانە ۇلتتىق مۋزىكالىق اسپاپتاردىڭ ۇنىمەن سۇيەمەلدەنگەن كەرەمەت كورىنىس تالعامى بيىك كورەرمەن كوڭىلىنەن شىقتى.