«Alataý» dástúrli óner teatrynyń qorjyny taǵy bir tamasha týyndymen tolyqty. Mámlúkter arasynan shyǵyp, XIII ǵasyrda Mysyrdy bılegen túrki tektes sultan, ortaǵasyrlyq Mysyrdyń asa iri áskerı jáne memleket qaıratkeri Beıbarys sultannyń 800 jyldyq mereıtoıyna oraı teatrda «Mamluk. Sultan Beıbarys» qoıylymynyń premerasy 7 aqpanda ótti.
Saýnddramanyń qoıýshy rejısseri Farhad Moldaǵalı, plastıka rejısseri Shyryn Mustafına, horeografy Ádilet Tamenov, kompozıtory Serikjan Aıtqalıev, kostıým sýretshisi Alma Syrbaeva, saýnd-dızaıneri Dıdar Isahan.
Spektaklde rejısser qysqa ýaqyt ishinde túrki tekti Deshti Qypshaq qandasy, quldan sultan shyǵyp, alystaǵy arab elinde taq ıesi dárejesine jetken ál-Málik az-Zákir Rýh-ad-dın Beıbarys ál- Býndýkdarı ál-Salıhlı – Sultan Beıbarystyń ómir jolyn, mámlúk áskerin basqaryp shaıqastarda erligimen kózge túsip, Mysyr men Sırııa ámirshisi dárejesine jetkenin sýretteýge tyrysqan.
Aty ańyzǵa aınalǵan Beıbarystyń rólin daryndy akter Áset Esjan tamasha oryndap shyǵyp, «men kimmin?» degen suraqqa jaýap izdegen keıipkerdiń jan dúnıesindegi arpalysyn, týǵan jerge degen saǵynyshyn kórermen júregine tamasha jetkize aldy. Akter Saǵyzbaı Qarabalın rólin somdaǵan Ustazynyń da «qosh bol... qypshaq bala!» dep qoshtasyp, Beıbarystyń sezim tolǵanysyn odan ári tolqytyp jibergen sáti spektakl kýlmınaııasy boldy desek artyq aıtpaımyz.
Qoıylym aldynda «Alataý» dástúrli óner teatry dırektory Maqsat Nuralıev, spektakl rejısseri Farhad Moldaǵalı BAQ ókilderimen kezdesip, spektakl jaıly tolyq aqparatpen bólisip, suraqtaryna jaýap berdi. Farhad Moldaǵalı jýrnalıstermen suhbatta qoıylymǵa teatr akterlary, bıshileri jáne ulttyq aspaptar ansambli tolyq qatysqanyn aıtty. Sonymen qatar, rejısser aldaǵy ýaqytta saýnddramany Qazaqstannyń basqa da óńirlerinde qoıyp, tipti Mysyr astanasy Kaırge de shyǵarý josparymyz bar degen oıymen bólisti.
Premerany tamashalaýǵa zııaly qaýym ókilderi qatysyp, bir aıta ketetini, qoıylymǵa arnalǵan bıletterdiń bári satylyp ketken.
Eki kún qatarynan qoıylǵan spektakl, akterlardyń sahnalyq kıimi, rekvızıtter jáne ulttyq mýzykalyq aspaptardyń únimen súıemeldengen keremet kórinis talǵamy bıik kórermen kóńilinen shyqty.
