ءاربىر ايەلگە جاقسى وتانا، ادال جار، ەڭ باستىسى تاماشا انا بولعىسى كەلەدى. بىراق كۇندەلىكتى قارابايىر تىرلىكپەن ءبىز كەز كەلگەن ايەلدى ناعىز انا دەگەن اتقا لايىق ەتەتىن قاراپايىم نارسەلەردى ۇمىت قالدىرىپ جاتامىز. ءبىز بالالارىمىزعا ولاردى جاقسى كورەتىنىمىزدى ايتىپ، جاي قۇشاقتاۋعا دا ۋاقىت تاپپاي جاتامىز. قالاي دەگەنمەن دە، ءبىزدىڭ ءجيى الاڭدايتىن قىمبات رەپەتيتورلار، جەكەمەنشىك مەكتەپتەر مەن باعالى ماتەريالدىق يگىلىكتەر انا مەن بالا اراسىنداعى بايلانىستى نىعايتا الماس. ارا-تۇرا سابيگە ءار نارسەنى ۇيرەتىپ، اقىل ايتا بەرگەننەن گورى، قاسىندا جاي عانا مەيىرىمدى ءارى جاناشىر انا بولۋدىڭ ماڭىزى كوپ.
جاقسى انا بولۋ ءۇشىن، كۇندەلىكتى ورىندالۋعا ءتيىس شارتتار:
1. بالاعا «مەن سەنى جاقسى كورەمىن» دەپ ءجيى ايتۋ كەرەك. بۇل ءسوزدىڭ ارتىقتىعى بولمايدى.
2. بالاعا ونى قۇشاقتاعان سىزگە ەرەكشە اسەر بەرەتىنىن جانە ەرەسەك ادامنىڭ دا كوپتەگەن پروبلەمالارىن شەشۋگە كومەكتەسەتىنىن كورسەتۋ كەرەك. ءسىز قينالىپ وتىرعاندا، كىشكەنتايىڭىزعا «كەلشى، مەنى قۇشاقتاشى» دەپ ايتساڭىز جەتكىلىكتى.
3. بالالارمەن كەشكى اس ءىشىپ وتىرعاندا، كۇندى قالاي وتكىزگەنى، قانداي قىزىقتى جاعدايلار بولعانى تۋرالى مىندەتتى تۇردە سۇراۋ كەرەك.
4. كەيدە بالانى باسقا ادامداردىڭ كوزىنشە ماقتاۋ دا ماڭىزدى، بالاعا مۇنداي ساتتەر اسا قاجەت.
5. بالالارعا ماقتاۋ ءسوز ايتا وتىرىپ، وسى ارقىلى بالانىڭ باسقا ادامدارعا دا ءوزىنىڭ ريزاشىلىعىن ءبىلدىرۋ ادىستەرىن كورسەتۋ كەرەك.
6. مۇمكىندىك بولا قالسا بولدى - بالانى ءسۇيىپ، قۇشاقتاڭىز.
7. بالانى كۇلۋگە ۇيرەتىڭىز. سونداي-اق ول وزىنە دە كۇلە ءبىلۋى كەرەك. كۇلكى كوپتەگەن قيىن جاعدايلاردان شىعۋعا كومەكتەسەدى.
8. بالانى ءوزىنىڭ ءىس-ارەكەتتەرىن جۇرەگىنە جاقىن الا بەرمەۋگە ۇيرەتۋ كەرەك. بارلىق ادام قاتەلىككە ۇرىنادى، بىراق ءوز كەمشىلىگىن جەڭىل قابىلداپ، كەيدە ءتىپتى قىزىق جاعدايعا اينالدىرىپ جىبەرۋ ەكىنىڭ ءبىرىنىڭ قولىنان كەلمەيدى. الايدا بۇل اسا ماڭىزدى.
9. بالاعا «راحمەت!» دەگەن ءسوزدى ءجيى ايتۋ كەرەك. وسىلايشا، ءبىز ونى ادامدارعا ريزاشىلىعىن بىلدىرە الاتىن، راحمەت ايتا الاتىن، كەڭپەيىل ادام بولىپ وسۋگە ۇيرەتەمىز.
10. بارىن كەشىرە ءبىلۋ كەرەك. بۇل بالاعا عانا قاتىستى ەمەس. مۇنى بالاعا دا ۇيرەتكەن دۇرىس. وعان قاتىگەزدىك ادامدى ىشتەي قينايتىنىن تۇسىندىرگەن ابزال.
11. بالاڭىزعا ارنايى كۇن ارناڭىز. ەكەۋىڭىز بىرگە وڭاشا وتكىزگەن ۋاقىتتار ەرەكشە ەستە قالادى. ەكەۋىڭىزدىڭ اراڭىزداعى بايلانىستى نىعايتادى.
12. بالانىڭ ءوزىنىڭ شىنايىلىعىن كورسەتۋگە تىيىم سالۋعا بولمايدى، ءتىپتى ونىڭ كوڭىل-كۇيى نەمەسە ءىس-ارەكەتى ءسىزدىڭ تۇسىنىگىڭىزگە قايشى كەلسە دە، وعان تىيىم سالماڭىز.
13. بالانىڭ تاڭى، ياعني، ۇيقىدان تۇرعان ءساتى كۇلكىدەن، سۇيۋدەن باستالۋى كەرەك. تەك «كەشىگىپ بارامىز!» دەگەن اسىعىس ايقايدان ساق بولىڭىز!
14. بالاڭىز نە ايتقىسى كەلسە دە، بۇعان الەمدەگى ەڭ ماڭىزدى اڭگىمە سياقتى نازار اۋدارىڭىز.
15. سىزدىڭ وتباسىڭىزعا قاتىستى جايتتارعا قاتىستى بالانىڭ كوزقاراسىن بىلۋگە تىرىسىڭىز. ونىڭ پىكىرى دە ەسكەرىلەتىنىن سەزىنۋى كەرەك.
16. بالاعا كۇردەلى ىستەردى جۇكتەۋگە قورىقپاڭىز. قاتەلەسسە، قاتەلەسسىن، بىراق ونىڭ نە ەكەنىن ەندى بىلەدى. ومىرىندە قاجەت بولۋى مۇمكىن.
17. بالالاردان كومەك سۇراۋعا بولادى جانە سۇراۋ قاجەت.
18. قاتەلىكتى مويىنداي ءبىلۋ كەرەك. ءسىزدىڭ ءوز كەمشىلىكتەرىڭىزدى مويىنداۋىڭىز، بالانى ءوز قاتەلىكتەرىنە جەڭىل قاراۋعا ۇيرەتەدى. بالا ءوزى عانا قاتەلەسپەيتىنىن تۇسىنەدى.
19. سىزگە بالاباقشاداعى دوسىنىڭ ەسىمى، ويىنشىقتىڭ اتى سياقتى بالاڭىزعا قاتىستى ۇساق-تۇيەكتىڭ بارلىعى ماڭىزدى بولۋى قاجەت.
20. بالاڭىزعا ۇنايتىن، تارتىمدى ءارى جاعىمدى ەركەلەتەتىن لاقاپ ات ويلاپ تابىڭىز.
21. كەيدە ەرتەگىنىڭ ورنىنا ءوز ومىرىڭىزدەن قانداي دا ءبىر وقيعانى ايتىپ بەرىڭىز. مۇنىڭ بارلىعى ونى سىزبەن عانا ەمەس، جالپى وتباسىمەن جاقىنداتا تۇسەدى.
22. كەيدە مۋزىكا قوسىپ، بىرگە بيلەڭىزدەر. مۇنداي ساتتەر ەڭ تاماشا كەزدەر دەسە بولادى. وتباسىڭىز عانا تۇسىنەتىن قۇپيا پارول نەمەسە قۇپيا سوزدەر ويلاپ تابۋعا بولادى.
23. كەيدە بالانىڭ بوساڭسۋىنا مۇمكىندىك بەرۋ كەرەك: شۇلىعى مەن كيىمدەرىن بولمەگە لاقتىرىپ، وزىنە بوياۋ جاقسا دا، بالاعا ءبىراز ەركىندىك بەرىڭىز. ءۇي جينالادى، ال بالانىڭ سول كەزدەگى قۋانىشى ەستە قالادى. بىراق ءار نارسەنىڭ شەگى بار. باستىسى – ارتىق كەتپەۋ.
24. اندا-ساندا بولسا دا، بالاعا كەيدە ءتارتىپ بۇزۋعا مۇمكىندىك بەرۋ كەرەك: كەشكە دەيىن تەلەديدار كورسىن، اندا-ساندا مەكتەپكە بارماسىن. وسىنداي سيرەك بەرىلەتىن مۇمكىندىكتەر بالا ءۇشىن ۇلكەن مەرەكە.
25. سىز ءوزىڭىزدىڭ كەمشىلىگىڭىزدى تۇسىنسەڭىز، كەشىرىم سۇراڭىز. بۇل وتە ماڭىزدى.
26. بالاعا وزدىگىنەن شەشىم قابىلداۋىنا مۇمكىندىك بەرىڭىز.
27. ەگەر بالاعا بىردەڭە ۋادە بەرسەڭىز، ونى مىندەتتى تۇردە ورىنداۋ كەرەك. يا بولماسا، ۋادە بەرۋدى قويىڭىز.
28. بالا ءان ايتسا، وعان قوسىلىپ اندەتۋ كەرەك.
29. بالاعا ونىڭ اكەسى الەمدەگى ەڭ مەيىرىمدى ءارى ەڭ كەرەمەت اكە ەكەنىن ايتىپ وتىرۋدى ۇمىتپاڭىز.
30. بالاڭىزدىڭ سىزگە جاساعان ءاربىر سىيلىعىن، قۇتتىقتاۋلارىن ساقتاپ قويىڭىز. ارا-تۇرا بىرگە قاراپ، ەسكە الىپ تۇرعان دا ماڭىزدى.
دەرەككوز : anabol.kz
"ادىرنا" ۇلتتىق پورتالى
