«AMANAT» پارتياسىنىڭ «قارىزسىز قوعام» جوباسى اياسىندا قارجىلىق ساۋاتتى ارتتىرۋ كۋرسى باستاۋ الدى.
بيىل 750 مىڭ وتانداسىمىز قاراجاتتى ۇتىمدى باسقارىپ، شىعىندى وڭتايلاندىرۋدى ۇيرەنەدى. حالىقتىڭ قارجىلىق ساۋاتىن ارتتىرۋدى كوزدەيتىن «قارىزسىز قوعام» جوباسى جالعاسۋدا. ماسەلەن، بۇگىن كۋرستان وتۋگە تىلەك بىلدىرگەن ازاماتتاردىڭ العاشقى لەگىن وقىتۋ جۇمىسى باستالدى. ايتا كەتەيىك، بىلتىر جوباعا 8 ءوڭىردىڭ تۇرعىندارى عانا قاتىسا السا، ەندى تۇرعىلىقتى جەرىنە قاراماستان بارلىق نيەت ءبىلدىرۋشى وقۋعا جازىلا الادى. وسى اپتادا 6 مىڭ ادام وقىتۋ كۋرسىنان وتەدى. وسى ورايدا، پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ بارشا قاتىسۋشىعا ساتتىلىك تىلەپ، قۇتتىقتاۋ ءسوزىن سويلەدى.
«حالىقتىڭ شامادان تىس نەسيە الۋى – وتە وتكىر ماسەلە. ميلليونداعان ادام كومەك پەن قولداۋعا ءزارۋ. ەلىمىزدەگى ەكونوميكالىق بەلسەندى حالىقتىڭ 15%-دان كوبىندە 90 كۇننەن استام ۋاقىت تولەنبەي كەلگەن نەسيە بەرەشەگى بار. بۇگىن ەلىمىزدىڭ بارلىق وڭىرىندە حالىقتىڭ قارجىلىق ساۋاتىن ارتتىرۋدى كوزدەيتىن جاپپاي وقىتۋ كۋرسى باستاۋ الدى. جوبا ساراپشىلارى ءار ازاماتقا جەكە-دارا كومەك كورسەتەدى. ەشقانداي ماسەلە ەسكەرۋسىز قالمايدى»، – دەدى ۆيتسە-پرەمەر.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ازاماتتاردىڭ قارجىلىق ساۋاتىن ارتتىرۋدىڭ ماڭىزىن اتاپ ءوتىپ، «AMANAT» پارتياسىنا ۇكىمەتپەن بىرلەسىپ «قارىزسىز قوعام» جوباسىنىڭ اۋقىمىن كەڭەيتۋدى تاپسىردى. «AMANAT» پارتياسىنىڭ اتقارۋشى حاتشىسى داۋلەت كارىبەكتىڭ ايتۋىنشا، بيىل ەلىمىزدىڭ بارلىق 20 وڭىرىندە 200 مىڭ ادامدى وقىتۋ جوسپارلانۋدا. سونداي-اق مەكتەپ، كوللەدج جانە جوعارى وقۋ ورنىنا ارنالعان ادىستەمەلىك قۇرالدار ازىرلەنەدى. بۇل شامامەن 100 مىڭ ستۋدەنت پەن 450 مىڭ وقۋشىنى قاراجاتقا نەعۇرلىم جاۋاپتى قاراۋعا ۇيرەتۋگە مۇمكىندىك بەرەدى.
«بيىل قارجىلىق ساۋاتتى مەكتەپ قابىرعاسىنان باستاپ ارتتىرۋدى قولعا الامىز. سونداي-اق، ەلىمىزدىڭ بارلىق 20 وڭىرىندە پارتيامىزدىڭ فيليالدارى جانىنان «قارىزسىز قوعام» جوبالىق كەڭسەلەرى اشىلادى. وندا كەز-كەلگەن ادام قارجىلىق جانە قۇقىقتىق ماسەلەلەر بويىنشا كەلەلى كەڭەس الا الادى. بۇگىندە ءاربىر ەكىنشى قاتىسۋشىنىڭ وتباسىنداعى ورتاق تابىسى 100 مىڭ تەڭگەگە دە جەتپەيدى. سونىمەن قاتار، كۋرستان وتكەن ازاماتتاردىڭ ۇشتەن بىرىندە ەكى نەمەسە ودان دا كوپ نەسيە بار. قاتىسۋشىلار اراسىندا بالاسىنىڭ نەسيەسىن تولەۋگە ءماجبۇر بولعان زەينەتكەرلەر دە كەزدەستى. جوبانىڭ نەگىزگى ماقساتى – ادامدارعا نەسيە اۋىرتپاشىلىعىن جەڭىلدەتۋگە كومەكتەسۋ. جالپى، بىلتىر 65 مىڭنان استام وتانداسىمىز قارجىلىق ساۋاتىن ارتتىردى. ەندى ونى 750 مىڭ ادامعا جەتكىزۋدى كوزدەپ وتىرمىز»، – دەدى ول.
«قارىزسىز قوعامعا» قاتىسۋشىلاردىڭ 58%-ى – ءتورت نەمەسە ودان دا كوپ بالا تاربيەلەپ وتىرعان كوپبالالى وتباسىلار. جوبا جەتەكشىسى اقمارال بەكمۇرزاەۆانىڭ ايتۋىنشا، ادامدار كۇندەلىكتى قاجەتىن وتەۋ ءۇشىن نەسيە راسىمدەيدى.
«وكىنىشكە قاراي، ادامدار نەسيەنى جاعدايى جاقسى بولعاننان المايدى. ماسەلەن، كومىر ساتىپ الۋ ءۇشىن نەسيە راسىمدەگەن ادامداردى دا جۇزدەستىردىك. ياعني، ازاماتتار قاراپايىم قاجەتتىلىگىن وتەيدى. الايدا، نەسيە وتباسىنداعى قارىم-قاتىناسقا تەرىس اسەر ەتەدى. ءتىپتى، جوباعا قاتىسۋشىلاردىڭ ءبىرى قارىزعا بەلشەسىنەن باتقاندىقتان، اعايىن-تۋىسى دا ودان سىرت اينالعانىن ايتتى. سوندىقتان، قارجىلىق ساۋاتتى ارتتىرۋ – اۋاداي قاجەت»، – دەدى ول.
سونداي-اق، ءىس-شارا بارىسىندا: قارجى نارىعىن رەتتەۋ جانە دامىتۋ اگەنتتىگى توراعاسىنىڭ ءبىرىنشى ورىنباسارى نۇرلان ءابدىراحمانوۆ, وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا, عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, ءماجىلىس دەپۋتاتى، «AMANAT» فراكتسياسىنىڭ مۇشەسى بەرىك بەيسەنعاليەۆ, Halyk Bank باسقارما توراعاسىنىڭ ورىنباسارى داۋرەن سارتاەۆ جانە تاعى باسقالار ءسوز سويلەدى.
ەسكە سالا كەتەيىك، «قارىزسىز قوعام» جوباسى بىلتىر 2 مامىردا قاناتقاقتى رەجيمدە باستاۋ الدى. ساراپشىلاردىڭ دارىسىنەن بولەك، جوباعا قاتىسۋشىلار enbek.kz پورتالىنا تىركەلۋ جانە جك اشۋدان باستاپ، سوتتان تىس بانكروتتىقتى سۇيەمەلدەۋ جانە بەرەشەكتى وتەۋ كەستەسىن ازىرلەۋگە دەيىنگى ءتۇرلى سۇراقتار بويىنشا كەڭەس الادى. سونداي-اق، وقىتۋ بارىسىندا قاتىسۋشىلارعا زاڭگەر كومەگىنە كەپىلدىك بەرىلەدى. ولار ءار قارىز الۋشىنىڭ نەسيە تاريحىن جەكە زەرتتەپ، قارىز جۇكتەمەسىن جەڭىلدەتۋ بويىنشا كەڭەس بەرەدى.
كۋرسقا جازىلۋ ءۇشىن تۇرعىلىقتى جەرى بويىنشا «AMANAT» پارتياسىنىڭ اۋداندىق فيليالىنا حابارلاسۋ قاجەت. جوباعا قاتىسۋشىلار كۇندىزگى فورماتتا ساۋاتىن ارتتىرىپ، ءبىر توپتا 50 ادامعا دەيىن وقىتىلادى. ءدارىستىڭ ۇزاقتىعى – 5 جۇمىس كۇنى.
«AMANAT» پارتياسىنىڭ ءباسپاسوز قىزمەتى
سۋرەتتى تۇسىرگەن: ءالي عالىم
