ومبۋدسمەن ارتۋر لاستاەۆ ەلىمىزدەگى قىز الىپ قاشۋ "داستۇرىنە" قاتىستى پىكىر ءبىلدىردى، دەپ حابارلايدى "ادىرنا" ءتىلشىسى.
شىمكەنت قالاسىندا وتكەن ايدىڭ ورتاسىندا ماڭعىستاۋ وبلىسىنىڭ تۋماسى قىز الىپ قاشامىن دەپ جازالانعان بولاتىن.
22 جاستاعى جىگىت قىزدى قالىڭدىق ەتۋ ماقساتىندا كوشەنىڭ قاق ورتاسىندا ۇرلاپ كەتكەن. قازىر كۇدىكتىگە قاتىستى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسى بەكىتىلگەن ەدى.
قازاقستان رەسپۋبليكاسىنداعى ادام قۇقىقتارى جونىندەگى ۋاكىل دە شىمكەنتتەگى پرەتسەدەنت ءجىتى باقىلاۋىندا ەكەنىن ايتتى.
ادام قۇقىقتارى جونىندەگى ۋاكىل كەڭسەسى تۇرمىستىق زورلىق-زومبىلىق پەن ايەلدەر قۇقىعىنىڭ بۇزىلۋى ماسەلەسىنە تالداۋ جاساۋدا. ماجبۇرلەپ نەكەگە تۇرعان قىزدار كوبىنەسە سەرىكتەستەرىنىڭ جىنىستىق، فيزيكالىق جانە پسيحولوگيالىق زورلىق-زومبىلىقتىڭ قۇربانى بولادى. كەيدە ءماجبۇرلى كۇيەۋگە بەرۋ قىزداردى ءبىلىم مەن ماماندىق الۋ مۇمكىندىگىنەن ايىرادى، بۇل ولاردىڭ ونسىز دا وسال جاعدايىن ودان ءارى ناشارلاتادى. شىمكەنتتەگى ءىس - ورەسكەل قۇقىقبۇزۋشىلىق، ءبىز ونى باقىلاۋعا الدىق، - دەدى قازاقستان رەسپۋبليكاسىنداعى ادام قۇقىقتارى جونىندەگى ۋاكىل ارتۋر لاستاەۆ.
بىلتىر ومبۋدسمەن قىلمىستىق زاڭناماعا بىرقاتار تۇزەتۋلەر ەنگىزۋگە، جەكە باپ قوسۋعا جانە قىلمىستىق كودەكستىڭ 125-بابىنا قىلمىستىق جاۋاپتىلىقتان بوساتۋدى كوزدەيتىن ەسكەرتۋدى الىپ تاستاۋعا قاتىستى باستاما كوتەردى.
