Ombýdsmen Artýr Lastaev elimizdegi qyz alyp qashý "dástúrine" qatysty pikir bildirdi, dep habarlaıdy "Adyrna" tilshisi.
Shymkent qalasynda ótken aıdyń ortasynda Mańǵystaý oblysynyń týmasy qyz alyp qashamyn dep jazalanǵan bolatyn.
22 jastaǵy jigit qyzdy qalyńdyq etý maqsatynda kósheniń qaq ortasynda urlap ketken. Qazir kúdiktige qatysty 2 aı merzimge qamaýǵa alý túrindegi bultartpaý sharasy bekitilgen edi.
Qazaqstan Respýblıkasyndaǵy Adam quqyqtary jónindegi ýákil de Shymkenttegi preedent jiti baqylaýynda ekenin aıtty.
Adam quqyqtary jónindegi ýákil keńsesi turmystyq zorlyq-zombylyq pen áıelder quqyǵynyń buzylýy máselesine taldaý jasaýda. Májbúrlep nekege turǵan qyzdar kóbinese seriktesteriniń jynystyq, fızıkalyq jáne psıhologııalyq zorlyq-zombylyqtyń qurbany bolady. Keıde májbúrli kúıeýge berý qyzdardy bilim men mamandyq alý múmkindiginen aıyrady, bul olardyń onsyz da osal jaǵdaıyn odan ári nasharlatady. Shymkenttegi is - óreskel quqyqbuzýshylyq, biz ony baqylaýǵa aldyq, - dedi Qazaqstan Respýblıkasyndaǵy Adam quqyqtary jónindegi ýákil Artýr Lastaev.
Byltyr ombýdsmen qylmystyq zańnamaǵa birqatar túzetýler engizýge, jeke bap qosýǵa jáne Qylmystyq kodekstiń 125-babyna qylmystyq jaýaptylyqtan bosatýdy kózdeıtin eskertýdi alyp tastaýǵa qatysty bastama kóterdi.
