2024 جىلدىڭ 1 مامىرىنان باستاپ ەلوردا اۋەجايىندا ۇشۋ-قونۋ جولاعىن كۇردەلى جوندەۋگە بايلانىستى تۇنگى رەيستەرگە شەكتەۋلەر ەنگىزىلەدى، دەپ حابارلايدى “ادىرنا” ۇلتتىق پورتالى.
كۇردەلى جوندەۋ 2024 جىلدىڭ 1 مامىرىنان 24 جەلتوقسانىنا دەيىن تۇنگى ۋاقىتتا، جەرگىلىكتى ۋاقىت بويىنشا 22:00-دەن 06:00-گە دەيىن جۇرگىزىلەدى. استانا اۋەجايىندا بارلىق تۇنگى رەيستەردىڭ ۋاقىتى وزگەرەتىنىن ايتىلدى.
"ەلوردا اۋەجايىنداعى ۇشۋ-قونۋ جولاعىن كۇردەلى جوندەۋگە بايلانىستى بارلىق تۇنگى رەيستەردىڭ ۇشۋ/قونۋ ۋاقىتى وزگەرتىلەدى. كۇردەلى جوندەۋ جۇمىستارى مامىر ايىنىڭ باسىنان باستاپ اعىمداعى جىلدىڭ سوڭىنا دەيىن ۋچاسكەلەردە جۇرگىزىلەدى دەپ جوسپارلانۋدا", - دەلىنگەن حابارلامادا.
استانا اۋەجايىنان تۇندە ۇشۋدى جوسپارلاعان جولاۋشىلار ۇشۋ كەستەسىندەگى ىقتيمال وزگەرىستەر تۋرالى ءبىلۋ ءۇشىن اۋە كومپانيالارىنا الدىن الا حابارلاسۋى كەرەك ەكەنى اتاپ ءوتىلدى.
"بۇگىنگى كۇنى 100-دەن استام ۇشىپ-قونۋ رەيسى وزگەرتىلدى. جولاۋشىلار اۋە كومپانيالارىنان رەيستەردەگى وزگەرىستەردى، ناقتى ۋاقىتى پەن كۇنىن انىقتاپ ءبىلۋى كەرەك", - دەپ حابارلادى اۋەجايدان.
“ادىرنا” ۇلتتىق پورتالى
