مادەنيەت جانە اقپارات ءمينيسترى ايدا بالاەۆا ءباسپاسوز قىزمەتكەرلەرىن كاسىبي مەرەكەلەرىمەن قۇتتىقتادى، دەپ حابارلايدى «ادىرنا» ءتىلشىسى.
«قۇرمەتتى دوستار! بارشا ارىپتەستەرىمدى ۇلتتىق باسىلىم كۇنىمەن قۇتتىقتايمىن!قازاق ءباسپاسوزىنىڭ تاعىلىمعا تولى تاريحىندا بۇل كۇننىڭ ماڭىزى بولەك. سەبەبى ءدال وسى كۇنى ءاليحان بوكەيحانۇلى، احمەت بايتۇرسىنۇلى، مىرجاقىپ دۋلاتۇلى سەكىلدى ۇلت زيالىلارىنىڭ ەسىمىمەن ۇشتاسىپ جاتقان «قازاق» گازەتىنىڭ العاشقى سانى جارىق كوردى. سوندىقتان، وتكەن جىلى ۇكىمەت قاۋلىسىمەن 2 اقپان – ۇلتتىق باسىلىم كۇنى بولىپ بەكىتىلۋىنىڭ وزىندىك سيمۆولدىق ءمانى بار دەپ بىلەمىز.
ۇلت مۇددەسىن قورعاۋدا ۇلتتىق-ساياسي مىنبەرگە اينالعان «قازاق» گازەتى بولاشاققا دەگەن ۇلى مۇرات جولىندا بارشا حالىقتىڭ باسىن بىرىكتىردى. ۇلتتىق بىرلىك پەن ىنتىماقتىڭ ەرەن ۇلگىسىن كورسەتىپ، قازاق قوعامىننىڭ رۋحاني كەمەلدەنۋىنە ايرىقشا ىقپال ەتتى»،—دەدى ول.
مينيستر ەلىمىزدە ءباسپاسوزدىڭ ەلەۋلى ءرول اتقاراتىنىن اتاپ ءوتىپ، مينيسترلىكتىڭ مەرزىمدى باسىلىمدارعا ۇنەمى قولداۋ كورسەتىپ كەلە جاتقانىن جەتكىزدى.
«مەملەكەت باسشىسى «وتاندىق ءباسپاسوز ەلىمىزدىڭ تۇتاستىعى مەن تاتۋلىعىن نىعايتۋ جولىندا ەلەۋلى ءرول اتقارادى» دەپ اتاپ وتكەنىندەي، ءباسپاسوز قاشان دا ۇلتتىڭ ءۇنى، مەملەكەتتىگىمىزدىڭ تۇعىرى ىسپەتتى. مادەنيەت جانە اقپارات مينيسترلىگى مەرزىمدى باسىلىمدارعا ۇدايى قولداۋ كورسەتىپ كەلەدى.
1991 جىلى ەلىمىزدە تەك 10 رەسپۋبليكالىق گازەت پەن جۋرنال جارىق كورىپ، 21 تەلە جانە راديوارنا ەفيرگە شىقسا، 2024 جىلعى قاڭتارداعى ەسەپ بويىنشا قازاقستاندا 5 804 باق تىركەلگەن، ونىڭ 3 985 – ءى مەرزىمدى ءباسپاسوز باسىلىمى، 212-ءى تەلەارنا، 90-ى راديو، 1 222-ءى اقپاراتتىق اگەنتتىكتەر جانە جەلىلىك باسىلىمدار.
گازەت-جۋرنالدارعا جازىلۋ ءىسى دە وڭتايلاندىرىلىپ، "قازپوشتا" جانە Kaspi Bank قوسىمشالارى ارقىلى ونلاين-جازىلۋ جۇمىستارى جۇيەلەندى.
وتكەن جىلى ايماقتارداعى مەرزىمدى باسىلىمدارىنىڭ جۇمىس دەڭگەيىن ارتتىرۋ ماقساتىندا ۇيىمداستىرىلعان وڭىرلىك باق فورۋمى بيىل دا جالعاسىن تابادى.
الەمدە بولىپ جاتقان جاڭا ترەندتەرگە قاراماستان، مەرزىمدى باسىلىمداردىڭ ءجونى بولەك، ماڭىزى ەرەكشە. سول سەبەپتى، ۇلتتىق مەديانى دامىتۋ، باسەكەگە قابىلەتتى بۇقارالىق اقپارات قۇرالدارىن قالىپتاستىرۋ، جۋرناليستەردىڭ مارتەبەسىن ارتتىرۋ – نەگىزگى ماقساتتارىمىزدىڭ ءبىرى. الداعى ۋاقىتتا وسى باعىتتا ءبارىمىز بىرلەسە جۇمىس ىستەي بەرەمىز دەپ ويلايمىن.
سوندىقتان وسى سالاعا قاتىسى بار بارشا قىزمەتكەرلەردى ۇلتتىق ءباسپاسوز كۇنىمەن تاعى دا قۇتتىقتايمىن! سىزدەرگە شىعارماشىلىق تابىس پەن سارقىلماس شابىت تىلەيمىن!”»—دەدى ايدا عالىمقىزى.
