بيىل قۇرىلعانىنا 29 جىل تولاتىن "ازات" قوزعالىسى قايتا جاندانباق. بۇل جايلى قازاقستاننىڭ ازاماتتىق «ازات» قوزعالىسىنىڭ توراعاسى قوجا-احمەت حاسەن مالىمدەدى. الداعى كۇزدە بولاتىن پارلامەنت سايلاۋىنا "ازات" تا قاتىسپاق.
توقسانىنشى جىلدارى ساياسي ساحنانى بيلەگەن بۇل ۇيىم جايلى سول كەزدەگى الدىڭعى بۋىن بىلمەسە، قازىرگى ۇرپاق اتىن دا ەستىمەگەن. الەم جەلىدەن "ازات" قوزعالىسى جايلى قىسقا عانا مالىمەتكە قول جەتكىزدىك.
"ازات" ازاماتتىق قوزعالىسى - قوعامدىق-ساياسي ۇيىم. قۇرىلتاي ءماجىلىسى الماتىدا 1990 ج. 1 شىلدەدە ءوتتى. باستى ماقساتىن "حالىقارالىق وداقتىق شارتپەن بىرىككەن ەرىكتى دە تاۋەلسىز جاڭا قوعامداستىق شەڭبەرىندە قازاقستاننىڭ شىنايى مەملەكەتتىك ەگەمەندىگىنە قول جەتكىزۋ" دەپ بەلگىلەدى. قوزعالىستىڭ 14 وبلىستىق ۇيىمى بار. 1990-1993 جج. ارالىعىندا "ازات" گازەتى شىعىپ تۇردى. "ازات" قوزعالىسى قازاقستاندى قازاق حالقىن وتارشىلىق پەن توتاليتاريزم زارداپتارىنان ارىلتۋ ءۋشىن قاجەتتى زاڭداردىڭ قابىلدانۋى، ولاردىڭ دۇرىس ورىندالۋى جونىندە حالىققا ۇندەۋلەر تاراتىپ، ۇكىمەتكە ۇسىنىستار جاسادى، سەپاراتيستىك پيعىلداعى ۇيىمدارعا تويتارىس بەرۋ، ادام قۇقىقتارىن قورعاۋ جانە ت.ب. ۇلت مۇددەسىن كوزدەگەن ماسەلەلەردى باتىل كوتەرە ءبىلدى. مىنە، عالامتورداعى قىسقا مالىمەت وسى عانا.
سول كەزدەردەگى "ازاتتا" قىزمەت اتقارعان جىگىتتەر بۇل كۇنى قارتقا اينالدى. الدى فانيدەن باقيعا كوشتى.
«ازات» قوزعالىسىنىڭ اقساقالى جاعدا بابالىقۇلى، سابەتقازى اقاتاي، نۇرباقىت قويشىبەكوۆ، سول كەزدەگى «ازات» گازەتىنىڭ باس رەداكتوى باتىرحان دارىمبەت، ەتنوگراف عالىم ماقاش ءتاتىموۆ، مارات شورمانوۆ، گۇلجيحان بيبولدينوۆا. بۇل تىزىمگە سول جىلدارى قوزعالىسقا بەلسەنە قاتىسقان جاسارال قۋانىشالى، حاسەن قوجا-احمەت، ايسۇلۋ قادىرباي، سەرىك ەرعالي، ساعات ءجۇسىپ، داۋرەن ساتىبالدى، اسقار سىرعاباەۆ، راحات التاي، سامات ساقالۇلى، گۇلشات ەرۋلاردى دا قوسۋعا بولادى.
كۇزدەگى پارلامەنت سايلاۋىنا قاتىسامىز دەپ، بەلىن بەكەم بۋعاگن "ازاتتىقتار" وزدەرىنىڭ ساياسي كۇشتەرىن تاعى ءبىر مارتە سىناپ كورمەك. ەندەشە، قازاقستاننىڭ ازاماتتىق "ازات" قوزعالىسىنىڭ مالىمدەمەسىن قاز-قالپىندا بەرىپ وتىرمىز.
" ءتۇن-تۇنەكتەن كەيىن اعارىپ تاڭ اتاتىنىنداي، بۇگىنگى قازاقستان قوعامىنداعى احۋال كسرو بيلىگى داعدارىسقا ۇشىراعان 1990-1991 جىلدارداعىداي كۇيدە. بيلىكتەگى قاراقشى توپتىڭ حالىق نيەتىن دۇنيەقوڭىزدىقپەن ۋلاماققا، ۇرەي ارقىلى ۋىسىندا ۇستاماققا 30 جىل بويعى ارەكەتى اقىرى كۇيرەدى. بۇگىنگى قازاق قوعامى دۇنيەقوڭىز ەپتىلەردەن جيىركەنەتىن، قايراتكەرلەرىن، باتىرلارىن ىزدەيتىن اق جولعا قايتادان بەت بۇردى. حالىق ءوز كەلەشەگىن ويلاپ، اتا-مەكەن ەلى قازاقستاندى جالماۋىز بيلىكتەن قۇتقارۋعا بەل بۋدى. سوڭعى 20 جىلدا بيلىكتىڭ قۇرعان جاساندى پارتيالارىنىڭ قۇر سوزبەن الداۋسىراتىپ، ءىس-ارەكەتكە باستامايتىنىنا كوزى جەتكەن ازاماتتار جاڭادان پارتيا قۇرماق ويلارىن ايتۋدا.
الايدا قازىرگى زاڭمەن ساياسي پارتيا قۇرۋ ءۇشىن كەمىندە 9 وبلىستا بولىمشەلەر اشۋعا، 40 000 قول جيناۋعا از دەگەندە جارتى جىل ۋاقىت، قوماقتى قارجى كەرەك. زاڭدى جەڭىلدەتۋدى قازىرگى پارلامەنتتەن كۇتۋ قيىن. وزگەرتكەن كۇندە دە كۇزدە بولماق پارلامەنت ءماجىلىسى سايلاۋىنا دەيىن پارتيا قۇرىپ ۇلگىرۋ مۇمكىن ەمەس شارۋا. وسىنى تۇسىنگەن بىرنەشە وبلىستىق، قالالىق دارەجەدەگى ۇيىمدار ەلىمىزدەگى قوردالانعان ماسەلەلەردى كوپشىلىك بولىپ شەشىپ، وڭالتۋ ءۇشىن «ازات» قوزعالىسىندا باس قوسساق دەگەن ۇسىنىس ءبىلدىرىپ وتىر.
1990 جىلى قۇرىلعان قازاقستانداعى رەسپۋبليكالىق دارەجەلى ەڭ العاشقى قوعامدىق ۇيىم «ازات» قوزعالىسى، سوڭعى 20 جىلدا بيلىك قۇرعان جالعان وپپوزيتسيالىق ۇيىمدار ساياساتتان ىسىرماققا قانشاما زىميان ارەكەتتەر جاساعانىنا توتەپ بەرىپ، بۇگىنگە شەيىن تىركەۋىن جويماي، حالىقتىڭ شاما-شارقىنا قاراي ءىس-ارەكەتىن جاساپ كەلەدى. قازاقستانداعى بۇگىنگى قوعامدىق-ساياسي جاعدايعا وراي «ازات» قوزعالىسى ءوز جۇمىسىن جانداندىرۋعا كىرىستى. سوندىقتان، ارداقتى حالايىق، 30 جىلدان سوڭ قايتا كەلگەن تاريحي ءساتتى – حالقىمىزدىڭ پاسسيونارلىق ويانۋىن، ەلىمىزدە وڭ وزگەرىستەر جاساۋعا باعىتتاپ، «ازات» قوزعالىسىندا كۇش جۇمىلدىرايىق!"-دەيدى ءوزىنىڭ مالىمدەمەسىندە حاسەن قوجا-احمەت.
قازاقستاننىڭ ازاماتتىق «ازات» قوزعالىسىنىڭ توراعاسى قوجا-احمەت حاسەن
«ازات» قوزعالىسىنا جەكە يا ۇجىمدىق مۇشە بولۋ ءۇشىن مىنا تەلەفوندارعا حابارلاسىڭىزدار: الماتى قالاسىندا 382-57-61; 8 707 495 2132; استانا ق. 8 701 197 1961; اقتوبە ق: 8 777 91 9189
"ادىرنا" ۇلتتىق پورتالى
