Bıyl qurylǵanyna 29 jyl tolatyn "Azat" qozǵalysy qaıta jandanbaq. Bul jaıly Qazaqstannyń azamattyq «AZAT» qozǵalysynyń tóraǵasy Qoja-Ahmet Hasen málimdedi. Aldaǵy kúzde bolatyn Parlament saılaýyna "Azat" ta qatyspaq.
Toqsanynshy jyldary saıası sahnany bılegen bul uıym jaıly sol kezdegi aldyńǵy býyn bilmese, qazirgi urpaq atyn da estimegen. Álem jeliden "Azat" qozǵalysy jaıly qysqa ǵana málimetke qol jetkizdik.
"Azat" azamattyq qozǵalysy - qoǵamdyq-saıası uıym. Quryltaı májilisi Almatyda 1990 j. 1 shildede ótti. Basty maqsatyn "Halyqaralyq Odaqtyq shartpen birikken erikti de táýelsiz jańa qoǵamdastyq sheńberinde Qazaqstannyń shynaıy memlekettik egemendigine qol jetkizý" dep belgiledi. Qozǵalystyń 14 oblystyq uıymy bar. 1990-1993 jj. aralyǵynda "Azat" gazeti shyǵyp turdy. "Azat" qozǵalysy Qazaqstandy qazaq halqyn otarshylyq pen totalıtarızm zardaptarynan aryltý ýshin qajetti zańdardyń qabyldanýy, olardyń durys oryndalýy jóninde halyqqa úndeýler taratyp, úkimetke usynystar jasady, separatıstik pıǵyldaǵy uıymdarǵa toıtarys berý, adam quqyqtaryn qorǵaý jáne t.b. ult múddesin kózdegen máselelerdi batyl kótere bildi. Mine, ǵalamtordaǵy qysqa málimet osy ǵana.
Sol kezderdegi "Azatta" qyzmet atqarǵan jigitter bul kúni qartqa aınaldy. Aldy fánıden baqıǵa kóshti.
«Azat» qozǵalysynyń aqsaqaly Jaǵda Babalyquly, Sábetqazy Aqataı, Nurbaqyt Qoıshybekov, sol kezdegi «Azat» gazetiniń bas redaktoy Batyrhan Dárimbet, etnograf ǵalym Maqash Tátimov, Marat Shormanov, Gúljıhan Bıboldınova. Bul tizimge sol jyldary qozǵalysqa belsene qatysqan Jasaral Qýanysháli, Hasen Qoja-Ahmet, Aısulý Qadyrbaı, Serik Erǵalı, Saǵat Júsip, Dáýren Satybaldy, Asqar Syrǵabaev, Rahat Altaı, Samat Saqaluly, Gúlshat Erýlardy da qosýǵa bolady.
Kúzdegi parlament saılaýyna qatysamyz dep, belin bekem býǵagn "azattyqtar" ózderiniń saıası kúshterin taǵy bir márte synap kórmek. Endeshe, Qazaqstannyń azamattyq "AZAT" qozǵalysynyń málimdemesin qaz-qalpynda berip otyrmyz.
" Tún-túnekten keıin aǵaryp tań atatynyndaı, búgingi Qazaqstan qoǵamyndaǵy ahýal KSRO bıligi daǵdarysqa ushyraǵan 1990-1991 jyldardaǵydaı kúıde. Bıliktegi qaraqshy toptyń halyq nıetin dúnıeqońyzdyqpen ýlamaqqa, úreı arqyly ýysynda ustamaqqa 30 jyl boıǵy áreketi aqyry kúıredi. Búgingi qazaq qoǵamy dúnıeqońyz eptilerden jıirkenetin, qaıratkerlerin, batyrlaryn izdeıtin aq jolǵa qaıtadan bet burdy. Halyq óz keleshegin oılap, ata-meken eli Qazaqstandy jalmaýyz bılikten qutqarýǵa bel býdy. Sońǵy 20 jylda bıliktiń qurǵan jasandy partııalarynyń qur sózben aldaýsyratyp, is-áreketke bastamaıtynyna kózi jetken azamattar jańadan partııa qurmaq oılaryn aıtýda.
Alaıda qazirgi Zańmen saıası partııa qurý úshin keminde 9 oblysta bólimsheler ashýǵa, 40 000 qol jınaýǵa az degende jarty jyl ýaqyt, qomaqty qarjy kerek. Zańdy jeńildetýdi qazirgi Parlamentten kútý qıyn. Ózgertken kúnde de kúzde bolmaq Parlament Májilisi saılaýyna deıin partııa quryp úlgirý múmkin emes sharýa. Osyny túsingen birneshe oblystyq, qalalyq dárejedegi uıymdar elimizdegi qordalanǵan máselelerdi kópshilik bolyp sheship, ońaltý úshin «Azat» qozǵalysynda bas qossaq degen usynys bildirip otyr.
1990 jyly qurylǵan Qazaqstandaǵy respýblıkalyq dárejeli eń alǵashqy qoǵamdyq uıym «Azat» qozǵalysy, sońǵy 20 jylda bılik qurǵan jalǵan oppozıııalyq uıymdar saıasattan ysyrmaqqa qanshama zymııan áreketter jasaǵanyna tótep berip, búginge sheıin tirkeýin joımaı, halyqtyń shama-sharqyna qaraı is-áreketin jasap keledi. Qazaqstandaǵy búgingi qoǵamdyq-saıası jaǵdaıǵa oraı «Azat» qozǵalysy óz jumysyn jandandyrýǵa kiristi. Sondyqtan, ardaqty halaıyq, 30 jyldan soń qaıta kelgen tarıhı sátti – halqymyzdyń passıonarlyq oıanýyn, elimizde oń ózgerister jasaýǵa baǵyttap, «Azat» qozǵalysynda kúsh jumyldyraıyq!"-deıdi óziniń málimdemesinde Hasen Qoja-Ahmet.
Qazaqstannyń azamattyq «AZAT» qozǵalysynyń tóraǵasy Qoja-Ahmet Hasen
«Azat» qozǵalysyna jeke ıa ujymdyq múshe bolý úshin myna telefondarǵa habarlasyńyzdar: Almaty qalasynda 382-57-61; 8 707 495 2132; Astana q. 8 701 197 1961; Aqtóbe q: 8 777 91 9189
"Adyrna" ulttyq portaly
