قازاقستاندا 2023 جىلى اۆتونەسيە 81,5 پايىزعا وسكەن، دەپ حابارلايدى “ادىرنا” ۇلتتىق پورتالى ءبىرىنشى نەسيە بيۋروسىنا سىلتەمە تاستاپ.
«2022 جىلمەن سالىستىرعاندا بەرىلگەن نەسيەلەردىڭ جالپى سوماسى ەكى ەسەگە جۋىق ءوستى. 2023 جىلى كولىك ساتىپ الۋعا بەرىلگەن اۆتونەسيە كولەمى 1,6 ترلن تەڭگەگە دەيىن ءوستى. 2022 جىلى بۇل كورسەتكىش 708,5 ملرد تەڭگە بولعان»، - دەلىنگەن بەيسەنبى كۇنى Data Hab Telegram ارناسىندا.
اقپاراتقا سايكەس، 2023 جىلى 208,4 مىڭ اۆتوكولىك نەسيەسى بەرىلگەن. جەلتوقساندا 2023 جىلدىڭ باسىمەن سالىستىرعاندا ەميسسيانىڭ ورتاشا سوماسى 9,7 پايىزعا ءوسىپ، 7,9 ملن تەڭگەگە جەتكەن. ەميسسيانىڭ ەڭ جوعارى شەگى جەلتوقساندا – 178 ملرد تەڭگەگە 23,5 مىڭ نەسيە بولدى.
نەگىزى، بانكتەرگە قاراعاندا ميكرو قارجى ۇيىمدارىنىڭ اۆتو نەسيەسى «قىمبات». ماسەلەن جەلتوقسانداعى قورىتىندى بويىنشا ميكرو قارجى ۇيىمدارىنىڭ جىلدىق ءتيىمدى سىياقى مولشەرلەمەسى – 40,8 پايىز، ال بانكتەردىكى – 22,2 پايىزدى قۇرايدى. دەگەنمەن 2023 جىلى جالپى اۆتو نەسيەلەردىڭ 30,6 پايىزى (481,8 ملرد تەڭگە) ميكرو قارجى ۇيىمدارىنان الىنعان.
جالپى اۆتونەسيە پورتفەلى 2,5 ترلن. تەڭگەنى قۇرادى، بۇل ءبىر جىل بۇرىنعىدان 64,8 پايىزعا نەمەسە 1 ترلنعا ارتىق ەسەپتى كورسەتەدى.
“ادىرنا” ۇلتتىق پورتالى
