بۇگىن استانادا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وتكەن جىلى اتقارعان جۇمىسىن قورىتىندىلاپ، 2024 جىلعا ارنالعان مىندەتتەردى ايقىندادى.
وتىرىستى اشقان قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا مەملەكەت باسشىسى قول قويعان جارلىعىنا سايكەس كوميسسيا مۇشەلەرىن روتاتسيالاۋ جۇرگىزىلگەنىن اتاپ ءوتتى.
ايدا بالاەۆا ۇلتتىق كوميسسيانىڭ بۇرىنعى مۇشەلەرىنە جەمىستى ىنتىماقتاستىعى ءۇشىن العىسىن ءبىلدىرىپ، قاتىسۋشىلارعا جاڭا مۇشەلەردى تانىستىرىپ، ولارعا بىرقاتار مىندەتتەر جۇكتەدى.
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قۇرامىنا ءلاززات قالتاەۆا، تىلەكتەس ادامبەكوۆ، الفيا اديەۆا، رەنات زۋلحايروۆ، شولپان كارينوۆا، ەلميرا كاريموۆا، مۋسليم حاسەنوۆ ەندى.
«2023 جىل كوميسسيا قىزمەتىندە تابىستى، ناتيجەلى بولدى. مەملەكەت باسشىسى اتاپ وتكەن باسىمدىقتارعا سايكەس ۇلتتىق كوميسسيانىڭ وتكەن جىلعى قىزمەتى ايەلدەر مەن بالالاردىڭ قۇقىقتارىن قورعاۋ سالاسىنداعى وزەكتى ماسەلەلەردى زەردەلەۋگە باسا ءمان بەرىپ، بيلىك پەن ازاماتتىق قوعام جانە حالىقارالىق ۇيىمدار اراسىنداعى سۇرانىسقا يە ديالوگ الاڭىنا اينالدى.
ۇلتتىق كوميسسيا ساراپشىلارىنىڭ قاتىسۋىمەن الەۋمەتتىك كودەكس ازىرلەنىپ، "اكىمشىلىك قۇقىق بۇزۋشىلىق تۋرالى" جانە قازاقستان رەسپۋبليكاسىنىڭ قىلمىستىق كودەكسىنە وزگەرىستەر ەنگىزىلدى. "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن قامتاماسىز ەتۋ جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى ازىرلەندى»، - دەپ اتاپ ءوتتى ايدا بالاەۆا.
ونىڭ ايتۋىنشا، 2023 جىلى پروبلەمالاردى جان-جاقتى تالداۋ، وڭىرلىك ەرەكشەلىكتەردى باعالاۋ جانە وزەكتى ماسەلەلەر بويىنشا شەشىمدەر ازىرلەۋ ءۇشىن ۇلتتىق كوميسسيانىڭ ساراپتامالىق توپتارىنىڭ وڭىرلەرگە بارۋ تاجىريبەسى ەنگىزىلدى.
مونيتورينگ جانە ساراپتامالىق تالداۋ قورىتىندىسى بويىنشا جەكەمەنشىك مەكتەپكە دەيىنگى مەكەمەلەر مەن جازعى لاگەرلەردە بالالاردىڭ قاۋىپسىزدىگىن قامتاماسىز ەتۋ، كەلەڭسىزدىكتەرگە توسقاۋىل قويۋ، سونداي-اق بالالار اراسىنداعى بۋللينگ پەن ءسۋيتسيدتى الدىن الۋ بويىنشا بىرقاتار باستامالار ازىرلەندى.
زورلىق-زومبىلىق قۇرباندارىنا تەگىن قۇقىقتىق جانە پسيحولوگيالىق كومەك كورسەتۋ ءۇشىن "One Stop Service" جوباسى ىسكە قوسىلدى. جوبا اياسىندا ايەلدەر مەن بالالارعا قاتىستى 36 قىلمىستىق ءىس بويىنشا قولداۋ كورسەتىلدى. رەزونانس تۋدىرعان 11 ءىس ەرەكشە باقىلاۋعا الىندى.
ايەلدەر مەن بالالاردى قورعاۋ جونىندەگى ىستەرمەن اينالىساتىن ادۆوكاتتار مەن زاڭگەرلەرگە ارنالعان ارنايى ادىستەمە ازىرلەندى. بالالارعا زورلىق-زومبىلىق كورسەتۋ جاعدايلارىنا جەدەل ارەكەت ەتۋ الگوريتمى دايىندالىپ، مەملەكەتتىك ورگانداردىڭ تاجىريبەسىنە ەنگىزىلدى.
الەۋمەتتىك ماڭىزى بار 7 جوبا، ونىڭ ىشىندە "سامۇرىق-قازىنا"اق-مەن بىرلەسىپ 3 قايىرىمدىلىق جوباسى ىسكە اسىرىلدى.
ولاردىڭ قاتارىندا Astana hab – پەن بىرلەسكەن It-Aiel باعدارلاماسى بار. باعدارلاما 2 مىڭ جۇمىسسىز ايەلگە تابىس كوزىن ارتتىرۋعا جانە فريلانسەرلىك پلاتفورمالاردا اقشا تابۋدى تابۋدى ۇيرەنۋ ارقىلى قارجىلىق تاۋەلسىزدىككە قول جەتكىزۋگە مۇمكىندىك بەردى. «توميريس» ۇزاق مەرزىمدى ءبىلىم بەرۋ جوباسى قالالار مەن اۋىلدىق جەرلەردەگى تابىسقا جەتكەن قىزدار مەن ايەلدەردى قولداۋعا باعىتتالعان.
تاعى ءبىر ءساتتى جوبا - شالعاي اۋداندار مەن اۋىلداردا تۇراتىن ازاماتتارعا مەديتسينالىق، پسيحولوگيالىق، قۇقىقتىق جانە مەدياتيۆتىك كومەك كورسەتۋ جانە تەكسەرۋ ءۇشىن ىسكە قوسىلعان «سالاماتتى قازاقستان» پويىزى.
وتباسى، گەندەرلىك ساياسات جانە دەموگرافيا ماسەلەلەرى بويىنشا 12 زەرتتەۋ ۇيىمىن بىرىكتىرەتىن ۇلتتىق كونسورتسيۋم قۇرىلدى.
وڭىرلەردە ايەلدەر كاسىپكەرلىگىن دامىتۋ ورتالىقتارى، وتباسىن قولداۋ ورتالىقتارى جانە زورلىق-زومبىلىق قۇرباندارىنا ارنالعان داعدارىس ورتالىقتارى اشىلدى. انىقتاما ءۇشىن "سەنىم تەلەفونى" جۇمىس ىستەيدى.
وتباسى جانە گەندەرلىك ساياسات سالاسىنداعى حالىقارالىق مىندەتتەمەلەردى ورىنداۋ جانە حالىقارالىق ىنتىماقتاستىقتى دامىتۋ جونىندەگى مىندەتتەرگە ەرەكشە نازار اۋدارىلادى.
كوميسسيا قازاقستاندى حالىقارالىق قوعامداستىقتىڭ جاۋاپتى مۇشەسى رەتىندە ودان ءارى ىلگەرىلەتۋ جونىندەگى مىندەتتەردى ورىندادى.
ۇلتتىق كوميسسيا بازاسىندا شوعىرلاندىرىلعان مەملەكەتتىك ورگاندار مەن ۇەۇ-نىڭ جالپى قورىتىندىلارى بەدەلدى حالىقارالىق الاڭداردا تالقىلاۋعا ۇسىنىلدى.
جالپى، مەملەكەت باسشىسى اتاپ وتكەن باسىمدىقتاردى ەسكەرە وتىرىپ، ۇلتتىق كوميسسيا وتباسىلىق-دەموگرافيالىق جانە گەندەرلىك ساياسات، ايەلدەر مەن بالالاردىڭ قۇقىقتارىن قورعاۋ سالاسىنداعى مىندەتتەردى جۇيەلى تۇردە جۇزەگە اسىرۋدا.
ءسوز سوڭىندا ايدا بالاەۆا ۇلتتىق كوميسسيا جۇمىسىنىڭ الداعى كۇن ءتارتىبىن بەلگىلەدى.
مينيستر بيىلعا ارنالعان بىرقاتار نەگىزگى باسىمدىقتار قۇقىقتىق مادەنيەتتى جانە زاڭ بۇزۋشىلارعا قارسى كوزقاراستى قالىپتاستىرۋ، ءتۇرلى ماقساتتى توپتارمەن قوعامدىق تالقىلاۋدى دامىتۋ، ادامگەرشىلىك جانە وتباسىلىق قۇندىلىقتاردى نىعايتۋ، ايەلدەردىڭ قۇقىقتارى مەن مۇمكىندىكتەرىن كەڭەيتۋ جونىندەگى مىندەتتەردى اتادى.
