ادىلدىكتىڭ اق جولى الماتىنىڭ نۇرسۇلتان كوشەسى زامانبەكتىڭ اتىمەن اتالعاندا باستالادى.
كورنەكتى مەملەكەت جانە قوعام قايراتكەرى زامانبەك نۇرقادىلوۆ ءتىرى بولعاندا ەرتەڭ 2024 جىلى 15 قاڭتاردا 80 جاسقا تولار ەدى…
ەل بۇگىن وسىعان وراي ەسىل ەردىڭ ارۋاعىنا باعىشتاپ، الماتىدا اس بەرىپ، ەسكە الۋ ءىس-شاراسى ءوتىپتى.
پەيىشتە رۋحى شالقي بەرگەي.
قايسار قايراتكەر زامانبەك تۋرالى زامانداستارى ەستەلىكتەر ايتىپ، قر پرەزيدەنتىنىڭ كەڭەسشىسى- پرەزيدەنتتىڭ ءباسپاسوز حاتشىسى بەرىك ءۋالي مەملەكەت باسشىسى قاسىم-جومارت توقاەۆتىڭ حاتىن وقىپ بەرىپتى.
حاتتا زامانبەك نۇرقادىلوۆتىڭ تۋعان جەرى - الماتى وبلىسى كەگەن اۋدانىندا ەسكەرتكىش، ال الماتىدا تۇرعان ۇيىنە ەسكەرتكىش تاقتا ورناتىلاتىنى جازىلعان.
ءادىل قازاقستاننىڭ لەبى ەسە باستاعانداي، ەل جاپپاي قۋانا قولداپ جاتىر.
ۇزاعىنان ءسۇيىندىرسىن! يماندى دا، يگىلىكتى ءىس جالعاسىن تابا بەرسىن دەپ تىلەدىك.
وسىدان 19 جىل بۇرىن زامانبەك نۇرقادىلوۆ 2005 جىلدىڭ 12 قاراشاسىندا ءوز ۇيىندە قايعىلى قازاعا ۇشىراعاندا، ءبىزدىڭ بيلىكتىڭ بەتى بۇلك ەتپەي: “نۇرقادىلوۆ ءوزىن-ءوزى ءۇش رەت اتىپ ءولتىردى” دەپ بىلش ەتكىزدى…
قازا بولارىنان ونشاقتى كۇن بۇرىن مەن زاقاڭنان سول كەزدە ءوتىپ جاتقان پرەزيدەنت سايلاۋىنا بايلانىستى سۇقبات الىپ ەدىم. زاقاڭ ءۇي تەلەفونىندا ۇزاق اڭگىمە ايتقان ەدى سوندا. قاسىنداعى وپپوزيتسيادا بىرگە جۇرگەن ىنىلەرىنە دە وكپەسىن ايتىپ قالىپ ەدى تۇسپالداپ… زاقاڭنىڭ بۇل سۇقباتى سول كەزدە “قازاق ءۇنى” گازەتىندە جاريالاندى…
سول كەزدە مەن ءوزىم باسقاراتىن رەسپۋبليكالىق “قازاق ءۇنى” (“جاس قازاق ءۇنى”) گازەتىنىڭ ءبىرىنشى بەتىنە زامانبەكتىڭ پورترەتىن جاريالاپ، “اتقىزعان كىم؟ اتقان كىم”-دەپ قارالى قازاناما جازىپ ەدىم…
تۋرا سودان ءۇش اي ۋاقىت وتكەندە، 2006 جىلى 11 اقپاندا بەلگىلى ساياساتكەر التىنبەك سارسەنبايۇلى دا ءۇش سەرىگىمەن قازا تاپقاندا: “التىنبەك تە كەتتى! ال تاعى كىم؟!”-دەپ، التەكەڭنىڭ ۇلكەن سۋرەتىن گازەتتىڭ ءبىرىنشى بەتىنە تۇتاس بەرىپ، قازاناما جازدىم.
باسقا ەشقانداي باسىلىم ءدال “قازاق ءۇنى” گازەتىندەي ەتىپ قازاناما بەرىپ، جوقتاي العان جوق زامانبەكتىڭ دە، التىنبەكتىڭ دە قازاسىندا. ءتىپتى، التەكەڭنىڭ ءوزى بيلىكتە جۇرگەندە، اقپارات ءمينيسترى كەزىندە باس رەداكتور ەتكەن، سول كەزدە مەملەكەتتىك گازەتتەردىڭ باسشىلىعىندا وتىرعان دوستارىنىڭ كوبىسى جوقتاۋ تۇگىلى، ءبىر اۋىز نەكرولوگ جازۋعا دا جارامادى. مەن بۇل ءسوزىمدى كەيىن “دات” باسىلىمىنا سۇقبات بەرگەندە دە ايتتىم…
ءبىر بىلەتىنىمىز تەك جۇسىپبەك قورعاسبەك قانا قايرات كورسەتە ءبىلدى.
زاماننىڭ ەرى زامانبەكتىڭ زامانى تۋاتىن كەز كەلدى!..
ادىلدىكتىڭ اق جولى وتىز جىل ويىنا كەلگەنىن ىستەگەن وزبىر بيلىكتىڭ كۇنى تولىق بىتكەندە، قاڭتار قاسىرەتى بولعان الماتى كوشەسىنەن نۇرسۇلتاننىڭ اتى جويىلىپ، زامانبەكتىڭ اتىمەن اتالعاندا باستالادى…
قازىبەك يسا
