ءىىم: قازاقستاندا ميتينگ كەزىندە 4 مىڭ ادام ۇستالدى

102

قازاقستاندا ميتينگ كەزىندە 4 مىڭ ادام ۇستالعان. بۇل جونىندە ىشكى ىستەر ءمينيسترى ەرلان تۇرعىنباەۆ مالىمدەدى. «ماۋسىم ايىنىڭ 9,10, 11 جانە 12-ءى كۇندەرى قازاقستان قالالارىندا باس پروكۋراتۋرا مەن ءىىم ەسكەرتۋىنە قاراماستان زاڭسىز ميتينگتەر ءوتتى. شەرۋگە شىققان ازاماتتار «ميتينگ، شەرۋ، دەمونستراتسيا» تۋرالى زاڭدى بۇزدى. زاڭدا قانداي دا ءبىر ميتينگ وتكىزبەس بۇرىن جەرگىلىكتى اتقارۋشى بيلىك ورگاندارىنان رۇقسات الۋ كەرەكتىگى جونىندە انىق ايتىلعان. جەرگىلىكتى اتقارۋشى ورگانداردىڭ رۇقساتى بويىنشا عانا ميتينگتەر ءوتۋى ءتيىس» - دەدى تۇرعىنباەۆ. ءمينيستردىڭ سوزىنشە، پوليتسيا قىزمەتكەرلەرىنە ارنايى قۇرالدار پايدالانباۋعا بۇيىرىق بەرىلگەن جانە ميتينگ كەزىندە 4 مىڭعا جۋىق ادام ۇستالعان. «پوليتسيا تارتىپسىزدىكتەرگە قارسى قولداناتىن قۇرال-جابدىقتارمەن قامتاماسىز ەتىلگەن. ول گاز بالونى، دۋبينكا. بىراق ولار ونى قولدانعان جوق. تەك فيزيكالىق كۇش كورسەتىلدى. 4 مىڭعا جۋىق ازامات ۇستالدى» - دەپ مالىمدەدى تۇرعىنباەۆ. ۆەدومستۆا باسشىسىنىڭ ايتۋىنشا، 3 مىڭ ادامعا پروتوكول تولتىرىلىپ، سول ساتتە بوساتىلعان. 677 ادام سوت شەشىمى بويىنشا قاماۋعا الىنعان.  305 ادامعا ايىپپۇل سالىنعان. ەستەرىڭىزگە سالايىق، ماۋسىم ايىنىڭ 9,10,11,12-ءى كۇندەرى ارالىعىندا الماتى، نۇر-سۇلتان (استانا), شىمكەنت، اقتوبە سياقتى ءىرى قالالاردا كەزەكتەن تىس پرەزيدەنت سايلاۋىنا قارسى ميتينگتەر وتكەن. وعان مىڭداعان ادام قاتىسىپ، اقىرى جاپپاي ۇستالۋلارعا ۇلاسقان.

 

دەرەككوز: https://qazaqtimes.com/article/63997?fbclid=IwAR2PXFRHRNSZIoWm3LD3zBLJi3qWmGlfukU6iycjOqOAeUz0-G7H2eBnngY

"ادىرنا" ۇلتتىق پورتالى

پىكىرلەر