قازاقستاندا جولداردى باسقاراتىن «قازاۆتوجول» ۇلتتىق كومپانياسىنىڭ جامبىل وبلىستىق فيليالىنىڭ ءۇش شەنەۋنىگى قاماۋعا الىندى. ولار قىرعىزستانمەن شەكاراداعى «قورداي» باقىلاۋ-وتكىزۋ بەكەتىنىڭ قۇرىلىسى كەزىندە 194 ميلليون تەڭگەدەن استام (434 مىڭ دوللار) ۇرلىق جاسادى دەگەن كۇدىككە ءىلىندى، دەپ حابارلايدى "ادىرنا" ۇلتتىق پورتالى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتىنە سىلتەمە جاساپ.
«سوتتىڭ سانكتسياسىمەن بارلىق كۇدىكتىلەر: «قازاۆتوجول» فيليالى ديرەكتورىنىڭ ورىنباسارى، مەردىگەردىڭ وكىلى جانە تەحنيكالىق قاداعالاۋ ساراپشىسى قاماۋعا الىندى»، - دەلىنگەن حابارلامادا. ءىستىڭ باسقا مالىمەتتەرى، قاماۋعا الىنعانداردىڭ اتى-ءجونى حابارلانبايدى.
2020 جىلى "قورداي" وتكىزۋ پۋنكتى كەڭەيتىلىپ، قايتا جاڭارتىلدى. جۇمىستار ءبىر جىلعا سوزىلدى، ولاردىڭ قۇنى 5,2 ملرد تەڭگەنى ($11,6 ملن) قۇرادى. تاپسىرىس بەرۋشى "قازاۆتوجول", ال باس مەردىگەر — "دورستروي"جشس بولدى. ناتيجەسىندە، پۋنكتتىڭ وتكىزۋ قابىلەتى تاۋلىگىنە ءبىر-ەكى جارىم مىڭ اۆتوموبيلگە دەيىن ءوستى.
ايتا كەتەيىك، قازاقستاندىق جولشىلار اتىشۋلى سىبايلاس جەمقورلىق ىستەرىنە ءبىرىنشى رەت قاتىسىپ وتىرعان جوق. 2019 جىلى "قازاۆتوجول" ماڭعىستاۋ وبلىستىق فيليالىنىڭ ديرەكتورى مەن ونىڭ ورىنباسارى وڭىردە اۆتوجول سالۋ كەزىندە 500 ملن تەڭگە ($1,3 ملن) كولەمىندە پارا العانى ءۇشىن سوت ولارعا التى جىلعا باس بوستاندىعىنان ايىرۋ جازاسىن تاعايىندادى.
"ادىرنا" ۇلتتىق پورتالى
