يراننىڭ كەرمان قالاسىنداعى جوعارعى قولباسشى قاسەم سۇلەيماني جەرلەنگەن زيرات ماڭىنداعى جارىلىس سالدارىنان 73 ادام قازا تاۋىپ، 170-ءى جارالاندى، دەپ حابارلايدى “ادىرنا” پورتالى IRNA مەملەكەتتىك اقپارات اگەنتتىگىنە سىلتەپ.
جەرگىلىكتى باق-تىڭ حابارلاۋىنشا، ەكى جارىلىس بولعان. كەرمان وبلىسىنىڭ ساياسي جانە قاۋىپسىزدىك ىستەرى جونىندەگى ورىنباسارى IRNA اگەنتتىگىنە: «بۇل گاز جارىلىسى نەمەسە لاڭكەستىك ارەكەت پە ەكەنى ءالى بەلگىسىز»، - دەدى.
Tasnim اقپارات كوزدەرىنىڭ حابارلاۋىنشا، زيراتتىڭ كىرە بەرىسىنە جاقىن جەردە قاشىقتان جارۋعا بولاتىن بومبا سالىنعان ەكى پاكەت بولعان. IRNA دا لاڭكەستىك ارەكەتكە ۇقساس ءىس تۋرالى اقپارات بەردى.
ەسكە سالا كەتەيىك، بۇگىن، 3 قاڭتاردا زيراتتا قاسەم سۇلەيمانيدى ەسكە الۋ ءراسىمى ءوتتى. 2020 جىلدىڭ ءدال وسى كۇنى ول باعداد اۋەجايىنىڭ ماڭىندا اقش اۋە كۇشتەرىنىڭ زىمىراندىق شابۋىلىنان قازا تاپتى. قاسەم سۇلەيماني يسلام رەۆوليۋتسياسى ساقشىلار كورپۋسىنىڭ قۇرامىنداعى ەليتالىق «قۇدس» كۇشتەرىنىڭ جەتەكشىسى بولدى. كورپۋس يران ءۇشىن بارلاۋ جانە سىرتقى ارنايى وپەراتسيالارعا جاۋاپتى.
2020 جىلدىڭ 7 قاڭتارىندا كاسەم سۇلەيمانيدى جەرلەۋ ءراسىمى كەزىندە ميلليونداعان ازاماتتار كوشەگە شىعىپ، 50-دەن استام ادام قازا تاپقان توبەلەسكە اكەلدى.
