قر پرەزيدەنتىنىڭ كەڭەسشىسى، ءباسپاسوز حاتشىسى بەرىك ءۋالي ءبىر جىلدىڭ ىشىندە پرەزيدەنت قاسىم-جومارت توقاەۆتىڭ اتقارعان جۇمىستارىن باياندادى، دەپ حابارلايدى "ادىرنا" ءتىلشىسى قازاقپاراتقا سىلتەپ.
پرەزيدەنتتىڭ كەڭەسشىسى 2023 جىل ەلىمىزدە قانداي ماڭىزدى شەشىمدەر قابىلدانىپ، نەندەي وزگەرىستەر بولعانىنا توقتالدى.
بەرىك ءۋالي سۇحبات بارىسىندا "ادىلەتتى قازاقستاندى" قۇرۋ قالاي جۇزەگە اسىپ جاتقاندىعىنا توقتالدى.
"ادىلەتتى قازاقستاندى قۇرۋ جولىندا ماڭىزدى ساياسي-ەكونوميكالىق رەفورمالار جۇزەگە اسىرىلىپ جاتىر. وسى ورايدا بيىل مەملەكەت باسشىسى قوعامدا زاڭ مەن ءتارتىپ ۇستەمدىگىن ورناتۋعا، ادىلدىككە نەگىزدەلگەن جاڭا ەكونوميكالىق ۇلگىگە كوشۋگە، حالىقتىڭ تۇرمىس ساپاسىن جاقسارتۋعا، باسەكەگە قابىلەتتى ەل بولۋعا، ساپالى ۇلت قالىپتاستىرۋعا باعىتتالعان كوپتەگەن باستاما كوتەردى", - دەيدى بەرىك ءۋالي.
بيىل مەملەكەت باسشىسى جالپى بىرنەشە زاڭ قابىلداپ، بىرقاتار وزگەرىستەر جاساعان.
"قاسىم-جومارت كەمەلۇلىنىڭ تاپسىرماسىمەن بىرقاتار ماڭىزدى زاڭدار ازىرلەنىپ، كۇشىنە ەندى. مەملەكەت باسشىسى بيىل جالپى 98 زاڭعا، 344 جارلىققا، 91 وكىمگە قول قويدى. ءبىر قىزىق فاكتىمەن بولىسە كەتەيىن. پرەزيدەنت جىلدىڭ العاشقى كۇنى دە جۇمىسقا شىعىپ، «اگلومەراتسيالاردى دامىتۋ تۋرالى» زاڭعا قول قويعان ەكەن. استانا، الماتى، شىمكەنت، اقتوبە سياقتى حالقىنىڭ سانى 500 مىڭنان اساتىن شاھارلاردىڭ اينالاسىنداعى ەلدى مەكەندەردى دامىتۋ ءۇشىن بۇل زاڭنىڭ ءمان-ماڭىزى زور.
بۇدان بولەك، «ۇلتتىق قور – بالالارعا» باستاماسىن ىسكە اسىراتىن ءتيىستى زاڭعا قول قويدى. كەلەسى جىلدان باستاپ ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزى ەلىمىزدىڭ كامەلەتكە تولماعان ازاماتتارىنىڭ بارىنە تەڭدەي بولىنەتىن بولدى", - دەيدى قر پەزيدەنتىنىڭ ءباسپاسوز حاتشىسى.
بيىل ۇكىمەتتە دە ايتارلىقتاي وزگەرىستەر ورىن الدى. ءتورت جاڭا مينيسترلىك قۇرىلدى: سۋ رەسۋرستارى جانە يرريگاتسيا مينيسترلىگى، ونەركاسىپ جانە قۇرىلىس مينيسترلىگى، كولىك مينيسترلىگى، مادەنيەت جانە اقپارات مينيسترلىگى، تۋريزم جانە سپورت مينيسترلىگى. جەرگىلىكتى باسقارۋ جۇيەسىندە دە ءبىرشاما اۋىس-ءتۇيىس بولىپ، جاڭا قىزمەتكە بىرقاتار كادرلار تاعايىندالدى.
وسى تۇستا ايماقتاردىڭ احۋالى دا پرەزيدەنت نازارىنان تىس قالماعان. جىل سوڭىنا دەيىن توقاەۆ 14 وڭىرگە جۇمىس ساپارىمەن بارىپ، جەرگىلىكتى تۇرعىنداردىڭ تۇرمىسىمەن تانىسقان.
"ەل ىشىندەگى شىنايى احۋالمەن جاقسى تانىس. ونىڭ ۇستىنە، پرەزيدەنت اكىمشىلىگىنىڭ قۇرىلىمدىق بولىمشەلەرى كۇندەلىكتى قاجەتتى اقپاراتتى جەتكىزىپ وتىرادى. مەملەكەت باسشىسىنىڭ ءوزى دە الەۋمەتتىك جەلىلەردى، بۇقارالىق اقپارات قۇرالدارىن شولىپ، ءتيىستى تاپسىرمالار بەرەدى", - دەدى بەرىك ءۋالي.
ەلىمىزدە بيىل اپات تا از بولعان جوق. اباي وبلىسىنداعى ورمان ءورتى، 46 ادامنىڭ ءومىرىن جالماعان قاراعاندى وبلىسىنداعى جارىلىس، ەكىباستۇز، رۋدنىي، ريددەر، اقتاۋ سىندى قالالارداعى جىلۋ ماسەلەسى دە جينالىپ قالعان. پرەزيدەنت اپاتتان زارداپ شەككەندەر مەن مارقۇم بولعانداردىڭ تۋىستارىنا كومەك كورسەتتى.
2023 جىلى حالىقتى ءدۇر سىلكىندىرگەن وقيعالار كوپ بولدى. تۇركىستاندا زورلىقپەن ولتىرىلگەن 5 جاسار ءبۇلدىرشىننىڭ ءولىمى، قوعامدىق رەزونانس تۋدىرعان سالتانات نۇكەنوۆانىڭ اياۋسىز ءولىمى بار.
بەرىك ءۋاليدىڭ سوزىنشە، پرەزيدەنت ىشكى ىستەر ءمينيسترى ەرجان سادەنوۆكە، باس پروكۋرور بەرىك اسىلوۆقا، جوعارعى سوت توراعاسى اسلامبەك مەرعاليەۆكە ايەلدەر مەن بالالارعا قاتىستى زورلىق-زومبىلىق فاكتىلەرىنىڭ الدىن الۋ كەرەك ەكەنىن قاتاڭ ەسكەرتكەن. ءىستىڭ جەكە باقىلاۋدا بولاتىنىن دا ايتتى.
بۇگىندە مەملەكەت باسشىسىنىڭ قىزمەتىن باقىلاۋ جەڭىلدەدى. قاسىم-جومارت توقاەۆتىڭ الەۋمەتتىك جەلىدەگى پاراقشالارىندا كوپتەگەن اقپاراتتار، جولداۋلار مەن ۇندەۋلەر جاريالانادى.
"Aqorda تەلەگرام-ارناسى تۋرالى ايتار بولساق، زامان تالابى مەن قازىرگى اۋديتوريانىڭ الەۋمەتتىك جەلىگە جاپپاي بەت بۇرۋىن ەسكەرە وتىرىپ، وسىنداي ارنا اشۋ جونىندە 2022 جىلدىڭ 1 ناۋرىز كۇنى شەشىم قابىلداعان ەدىك. سودان بەرى Aqorda تەلەگرام-ارناسىندا 13931, سونىڭ ىشىندە بيىل 8022 اقپارات جاريالاندى. تەلەگرام ارناعا 44 428 وقىرمان جازىلعان.
مەملەكەت باسشىسىنىڭ ح (Twitter) الەۋمەتتىك جەلىسىندەگى پاراقشاسى 2011 جىلدان بەرى بەلسەندى جۇمىس ىستەپ كەلەدى. بۇگىندە پرەزيدەنتتىڭ ح پاراقشاسىندا 391 786 وقىرمان بار. ال Instagram پاراقشاسىنا 2,6 ميلليون جازىلۋشى تىركەلگەن.
پرەزيدەنت ح (Twitter) پاراقشاسى ارقىلى ەلىمىزدەگى قوعامدىق، الەۋمەتتىك-ەكونوميكالىق، ساياسي ماسەلەلەرگە نەمەسە وقيعالارعا قاتىستى جەدەل ءۇن قاتادى. ۋاقىت ۇنەمدەۋ تۇرعىسىنان مۇنداي جۇمىس ءستيلى ءتيىمدى. جالپى، قاسىم-جومارت كەمەلۇلى ەلىمىزدەگى وزەكتى ماسەلەلەرگە، قوعامدا بولىپ جاتقان ءتۇرلى وقيعالارعا قاتىستى بيىل 56 تۆيت جاريالادى. ال ينستاگرامدا 63 جازبا جارىق كوردى", - دەدى بەرىك ءۋالي.
ءبىر جىلدا بىرنەشە ەلگە ءىس-ساپارمەن بارىپ، 243 ساعات 46 مينۋتىن ۇشاقتا جانە تىكۇشاقتا وتكىزگەن پرەزيدەنتتىڭ جاڭا جىلدى قازاقستاندا، ءوز ۇيىندە، اۋلەتىمەن بىرگە قارسى الاتىنى ايتىلدى.
