Japonııanyń batys jaǵalaýyndaǵy Noto túbeginde bolǵan kúshti jer silkinisinen qaza tapqandar sany artýda. Japonııanyń premer-mınıstri Fýmıo Kıshıda 2 qańtarda qurbandardyń kóp ekenin aıtty, dep habarlaıdy “Adyrna” ulttyq portaly.
Jergilikti bıliktiń málimetinshe, kem degende 30 adamnyń qaza tapqany rastaldy. Eń úlken qıraý Isıkava prefektýrasynyń Vadzıma qalasynda boldy. Ol jerde 100-den astam úı órtenip, birazy qırady. 13 saǵat ótse de tutanǵan órtti tolyq sóndirý múmkin bolmady.
NHK telearnasynyń habarlaýynsha, qalada segiz adam qaza taýyp, keminde jeteýi aýyr jaralanǵan. Aımaqta izdeý-qutqarý jumystary jalǵasýda.
Aıta keteıik, 1 qańtarda Japonııanyń ortalyǵynda magnıtýdasy 7,6 baldy quraıtyn jer silkinisi boldy. Jer silkinisiniń oshaǵy – Noto túbegi. Degenmen, Japonııa astanasy Tokıoǵa jaqyn jerde, shamamen 400 shaqyrym qashyqtyqta úılerdiń dirili sezildi. Jer asty dúmpýleri kóshkinderge, jol jabyndarynyń jarylýyna, aǵashtar qulaýyna ákeldi.
Premer-mınıstr Kıshıdanyń aıtýynsha, kólik joldary buzylǵandyqtan túbektiń soltústik bóligine jetý qıyn. Qutqarýshylar oqshaýlanǵan aımaqtarǵa teńiz arqyly jetýge tyrysady.
Jer asty dúmpýleri seısenbi kúni tańerteń de jalǵasty. Japonııa meteorologııalyq basqarmasynyń málimetinshe, dúısenbiden beri barlyǵy 155 jerasty dúmpýleri tirkeldi. Meteorologtar apta ishinde, ásirese aldaǵy eki-úsh kúnde kúshti jer silkinisi bolýy múmkin ekenin eskertedi.
