19 جەلتوقساندا تاشكەنتتە كاتار ءامىرى شەيح تاميم بەن حاماد ءال تاني تاعايىنداعان سىبايلاس جەمقورلىققا قارسى كۇرەس حالىقارالىق سىيلىعىن تابىس ەتۋدىڭ رەسمي ءراسىمى ءوتتى، دەپ حابارلايدى "ادىرنا" ۇلتتىق پورتالى fergana اگەنتتىگىنە سىلتەپ.
سالتاناتتى شاراعا وزبەكستانعا جۇمىس ساپارىمەن كەلگەن كاتار ءامىرى، بىرىككەن ۇلتتار ۇيىمىنىڭ (بۇۇ) وكىلدەرى، 40-تان استام ەلدىڭ دەلەگاتسيالارى جانە جاڭا حالىقارالىق سىيلىقتىڭ بارلىق لاۋرەاتتارى قاتىستى.
«سىبايلاس جەمقورلىققا قارسى كۇرەستەگى جەتىستىكتەرى ءۇشىن» نوميناتسياسىندا سىيلىق Transparency International حالىقارالىق ۇيىمىنىڭ بۇرىنعى توراعاسى حوسە كارلوس ۋگاس سانچەس مورەنوعا (پەرۋ) بەرىلدى.
سينگاپۋر ۇلتتىق ۋنيۆەرسيتەتىنىڭ پروفەسسورى دجون كۋا (سينگاپۋر) مەن زاگرەب ۋنيۆەرسيتەتىنىڭ پروفەسسورى سۋنچانا روكسانديچ (حورۆاتيا) «زەرتتەۋ جانە ءبىلىم بەرۋ» ءۇشىن ماراپاتتالدى.
«سىبايلاس جەمقورلىققا قارسى كۇرەستەگى جاستار شىعارماشىلىعى ءۇشىن» ماراپاتتارى Youth4IntegrityBuilding (كەنيا) - ديرەكتورى داماريس اسۆا جانە All4Integrity (پورتۋگاليا) - نەگىزىن قالاۋشى اندرە كوررەا د'المەيدا ۇكىمەتتىك ەمەس ۇيىمدارىنا تابىس ەتىلدى.
«يننوۆاتسيالار جانە جۋرناليستىك زەرتتەۋ» نوميناتسياسىندا تەرگەۋشى-كوررەسپوندەنت كلەر ريۋكاسل-براۋن (ۇلىبريتانيا) جانە ۇلىبريتانيانىڭ حالىقارالىق دامۋ دەپارتامەنتىنىڭ سىبايلاس جەمقورلىققا قارسى ءىس-قيمىل دەپارتامەنتىنىڭ بۇرىنعى باسشىسى فيل مەيسون جەڭىمپاز اتاندى.
«سپورتتى سىبايلاس جەمقورلىقتان قورعاۋ» نوميناتسياسىندا ماراپاتتار جۋرناليست جانە ۆۆس جۇرگىزۋشىسى ۆايحيگا مۆاۋراعا (كەنيا) جانە ورتالىق ەۋروپا جاڭالىقتار اگەنتتىگىنىڭ رەداكتورى شانتانۋ گۋحا رەيگە ء(ۇندىستان) بەرىلدى.
«جەمقورلىقپەن كۇرەسۋ – ار-وجدانى تازا ءاربىر ادامنىڭ، ءاربىر دەموكراتيالىق قوعام مەن مەملەكەتتىڭ قاسيەتتى بورىشى»، - دەدى شاۆكات ميرزيوەۆ ماراپاتتاۋ راسىمىندە سويلەگەن سوزىندە.
پرەزيدەنت «سىبايلاس جەمقورلىق – بۇكىل ادامزاتتىڭ، بارلىق قوعامنىڭ نەگىزدەرىنە نۇقسان كەلتىرەتىن، ەكونوميكاعا نۇقسان كەلتىرەتىن، زاڭ ۇستەمدىگى قاعيداتتارىن بۇزاتىن جانە حالىقتىڭ مەملەكەتتىك ساياساتقا سەنىمىن كۇرت تومەندەتەتىن، دەموكراتيالىق ينستيتۋتتاردىڭ دامۋىنا كەدەرگى كەلتىرەتىن قاۋىپ» دەپ اتاپ كورسەتتى.
ميرزيەەۆ «جاڭا وزبەكستاندا دەموكراتيالىق رەفورمالار قايتىمسىز سيپاتقا يە بولىپ كەلە جاتقانىن، سونىمەن قاتار ءوز الدىلارىنا سىبايلاس جەمقورلىقپەن كۇرەس سالاسىندا ۇلكەن جوسپارلار مەن مىندەتتەر قويعانىن» ايتتى.
