ءبىر جارىم جىلدا ەلىمىزدە 10 ملن گەكتار جەر قايتارىلدى
«AMANAT» پارتياسىنىڭ اتقارۋشى حاتشىسى داۋلەت كارىبەك «جەر اماناتى» كوميسسياسىنىڭ مۇشەلەرىمەن بىرگە الماتى وبلىسىنىڭ تۇرعىندارىمەن كەزدەسىپ، جايىلىم تاپشىلىعى ماسەلەسىن تالقىلادى.
«جەر اماناتى» پارتيالىق كوميسسياسىنىڭ مۇشەلەرىمەن كەزدەسۋگە الماتى وبلىسى ەڭبەكشىقازاق اۋدانى قازتاي ۇلتاراقوۆ (ماساق) اۋىلىنىڭ تۇرعىندارى، 30-عا جۋىق فەرمەر كەلدى. اشىق اڭگىمە بارىسىندا اۋىل تۇرعىندارى مەن شارۋا قوجالىقتارىنىڭ باسشىلارى جەر تاپشىلىعى ماسەلەسىن عانا ەمەس، قۇدىق جەتىسپەۋشىلىگى، سۋبسيديالاردىڭ ازدىعى، ديزەل وتىنى باعاسىنىڭ شارىقتاۋى سياقتى بىرقاتار وزەكتى ماسەلە كوتەردى.
بۇعان دەيىن جەرگىلىكتى تۇرعىندار مال جاياتىن جەر جوق ەكەنىن ايتىپ، پارتياعا شاعىمدانعان بولاتىن. ال ىلە الاتاۋى «بۇعىتى» سىلەمىنىڭ اۋماعىنداعى ۇلكەن جەر ۋچاسكەسى جەكە قولعا ءوتىپ كەتكەن. ناتيجەسىندە، بيىل قىركۇيەك ايىندا «جەر اماناتى» كوميسسياسىنىڭ ارالاسۋىمەن 2,4 مىڭ گەكتار جەر مەملەكەت مەنشىگىنە قايتارىلىپ، جالپى پايدالانۋعا بەرىلدى. سونىمەن قاتار، وسى جىلى قاراشادا شەلەك اۋىلدىق وكرۋگى اۋماعىندا ورنالاسقان 11,8 مىڭ گەكتار جەر دە مەملەكەت مەنشىگىنە بەرىلدى.
«AMANAT» پارتياسىنىڭ اتقارۋشى حاتشىسى، «جەر اماناتى» كوميسسياسىنىڭ توراعاسى داۋلەت كارىبەك اتاپ وتكەندەي، ءبىر جارىم جىل ىشىندە ەل اۋماعىندا 10 ملن گەكتارعا جۋىق جەر قايتارىلدى. مەملەكەت باسشىسى قاسىم-جومارت توقاەۆ جەردى ءادىل ءبولۋ ماسەلەسىنە ەرەكشە نازار اۋدارادى. «AMANAT» پارتياسى پرەزيدەنتتىڭ قوعامدىق تىرەگى بولا وتىرىپ، جالپىحالىقتىق ماقسااتتى جۇزەگە اسىرۋدىڭ قوعامدىق مونيتورينگىن ءوز مىندەتىنە الىپ وتىر.
«اۋىلدىڭ ءاربىر تۇرعىنى جايىلىمعا قول جەتكىزە الۋى كەرەك. سوندىقتان «جەر اماناتى» كوميسسياسى پايدالانىلماي جاتقان اۋىل شارۋاشىلىعى ماقساتىنداعى جەرلەردى لاتيفۋنديستەردەن قايتارىپ الۋ بويىنشا جۇمىس ىستەۋدە. اتاپ ايتقاندا، الماتى وبلىسىندا 213,5 مىڭ گا جايىلىم جەر مەملەكەت مەنشىگىنە قايتارىلدى. ەڭبەكشىقازاق اۋدانىنىڭ قازتاي ۇلتاراقوۆ (ماساق) اۋىلىنىڭ تۇرعىندارى ىلە-الاتاۋ ۇلتتىق پاركىنىڭ اۋماعىنداعى اسسى ءۇستىرتىنىڭ 3,5 مىڭ گا جەرىن قايتارىپ الۋدى تاريحي ادىلدىكتىڭ ورناۋى دەپ سانايدى»، – دەپ اتاپ ءوتتى ول.
جەرگىلىكتى تۇرعىنداردىڭ ايتۋىنشا، اۋىل شارۋاشىلىعىمەن جانە مال باعۋمەن اينالىسقىسى كەلەتىن ادامداردىڭ سانى ارتىپ كەلەدى.
«بۇرىن ءبىز ەشتەڭەگە سەنبەيتىن ەدىك. اۋىلدىڭ احۋالىن جاقسارتۋمەن 30 جىلدان بەرى ەشكىم اينالىسقان جوق. بىراق قازىر بيلىككە، «AMANAT» پارتياسىنا دەگەن سەنىم ارتىپ كەلەدى. سەبەبى، زاڭسىز بولىنگەن جەرلەر مەملەكەت پەن حالىققا قايتارىلىپ جاتىر. اۋىل وركەندەسە، ادامداردىڭ ءال-اۋقاتى جاقسارسا – قالا تۇرعىندارىنا دا قولداۋ بولارى انىق»، – دەدى اقساقال رىسكەلدى جاقاباەۆ.
ال ءماجىلىس دەپۋتاتى باقىتجان بازاربەكتىڭ ايتۋىنشا، جايىلىمدى جەرلەردىڭ ماسەلەسى قازاقستاننىڭ تۇكپىر-تۇكپىرىندە وتە وزەكتى بولىپ تۇر.
«10 ملن گەكتارعا جۋىق جەر قايتارىلدى. بۇل – ءبىرىنشى كەزەكتە «جەر اماناتى» كوميسسياسىنىڭ جۇمىسى. ءبىز زاڭعا «قوعامدىق جايىلىم» دەگەن ۇعىمدى ەنگىزىپ وتىرمىز. «قوعامدىق جايىلىم» دەگەن ۇعىممەن قوسا، ەندى جەمقورلىققا بەلشەسىنەن باتقان اكىمدەر قوعامدىق جايىلىمدى جەرلەردى ىعاي-سىعايلارعا بەرۋگە قۇقىعى جوق. سەبەبى ول بازاعا قوعامدىق جايىلىمدىق جەرلەر رەتىندە ەنگىزىلەتىن بولادى. سونىمەن قاتار، ناقتى ءبىر ەلدىمەكەندە سوڭعى 5 جىل تۇرعان ازامات ەندى جەر الۋ كەزىندە قوسىمشا ۇپايعا يە بولادى. جايىلىمدى جەرلەردى ەگىستىك جەرلەرگە اينالدىرۋعا بولمايدى. سونداي-اق ەندى اكىمدەر جايىلىمدى جەرلەردى رەزەرۆكە قويۋعا مىندەتتەلەدى»، – دەيدى دەپۋتات.
ايتا كەتەيىك، «AMANAT» پارتياسىنىڭ الماتى وبلىستىق سايلاۋالدى باعدارلاماسىندا 2027 جىلعا دەيىن 260 مىڭ گەكتار جەردى مەملەكەت مەنشىگىنە قايتارۋ جونىندە مىندەتى قويىلدى. بۇگىندە بۇل جوسپاردىڭ 82%-ى ورىندالدى.
جەر ماسەلەسىن جەدەل شەشۋ ءۇشىن قازاقستاندىقتار زاڭ بۇزۋشىلىقتىڭ بارلىق فاكتىسى تۋرالى «AMANAT» پارتياسىنىڭ 8 800 080 44 41 تەلەفونى ارقىلى حابارلاي الادى. وتىنىمدەر WhatsApp ارقىلى دا +7 700 800 44 41 ءنومىرى بويىنشا قابىلدانادى.
«ادىرنا» ۇلتتىق پورتالى
