Memleket basshysy Qasym-Jomart Toqaev Kýveıt ámiri sheıh Naýýaf ál-Ahmad ál-Djaber as-Sabahtyń dúnıeden ozýyna baılanysty Kýveıt Memleketiniń jańa Ámiri sheıh Mıshaal ál-Ahmad ál-Djaber as-Sabahqa jáne Kýveıt halqyna kóńil aıtyp, jedel hat joldady. Bul týraly Aqorda jarııalady, dep habarlaıdy “Adyrna” ulttyq portaly.
Kýveıt Memleketiniń Ámiri sheıh Naýýaf ál-Ahmad ál- Djaber as-Sabahtyń dúnıeden ozǵany týraly sýyt habardy tereń kúızelispen qabyl aldym. Sheıh Naýýaf – ómirin Kýveıttiń ósip-órkendeýine jáne halqynyń baıandy bolashaǵyn qamtamasyz etýge, aımaqtaǵy beıbitshilik pen turaqtylyqty saqtaýǵa arnaǵan tulǵa. Qazaqstan halqy ony parasatty basshy, halyqaralyq deńgeıdegi bedeldi saıasatker, ekijaqty yntymaqtastyqty nyǵaıtýǵa zor eńbek sińirgen tarıhı qaıratker retinde árdaıym esinde saqtaıdy. Qaraly sátte Sizge jáne áýletińizge, sondaı-aq barsha otandasyńyzǵa Qazaqstan halqynyń jáne jeke ózimniń atymnan kóńil aıtyp, qaıǵylaryńyzǵa ortaqtasamyn, – dep jazylǵan jedelhatta.
