يراننىڭ مادەني مۇرا، قولونەر جانە تۋريزم ءمينيسترى يززاتۋللا زارگامي ەلدىڭ مينيسترلەر كابينەتىنىڭ 32 ەلمەن ۆيزالىق رەجيمدى جويۋدى بىرجاقتى تۇردە بەكىتكەنىن ايتتى، دەپ حابارلايدى «ادىرنا» ۇلتتىق پورتالى.
بۇل تۋرالى ول سارسەنبى كۇنى تەگەرانداعى مينيسترلەر كابينەتىنىڭ وتىرىسىنان كەيىن جۋرناليستەرگە ايتتى.
زارگامي يراننىڭ بۇكىل الەمگە ەل ەسىگىن اشۋعا نيەتتى ەكەنىن ايتتى.
ونىڭ ايتۋىنشا، يراننىڭ مادەني مۇرا، قولونەر جانە تۋريزم مينيسترلىگى 32 ەلمەن ۆيزالىق رەجيمنىڭ كۇشىن جويۋدى ۇسىنعان.
«يران الەممەن، ادامدارمەن سويلەسكىسى كەلەدى. ۆيزالىق رەجيمنىڭ بىرجاقتى كۇشىن جويۋ يرانعا وڭاي بارا الاتىن شەتەلدىك ازاماتتارمەن ديالوگ جۇرگىزۋ مۇمكىندىگى بولىپ تابىلادى»، - دەدى يران ءمينيسترى.
يران وسى ۋاقىتقا دەيىن 10 ەلمەن (6 ەل – ەكىجاقتى تارتىپپەن جانە 4 ەل – بىرجاقتى) ۆيزالىق رەجيمدى جويدى.
ايتا كەتەيىك، يران مەن قازاقستان ورتاسىندا دا ەكى اپتاعا دەيىن بارىس-كەلىسكە ۆيزا تالاپ ەتىلمەيدى.
«ادىرنا» ۇلتتىق پورتالى
