سوڭعى ءۇش تاۋلىك ىشىندە توتەنشە جاعدايلار مينيسترلىگىنىڭ كۇشتەرى 1000-نان استام ادامدى، ونىڭ ىشىندە 86 بالانى قۇتقاردى. 583 ءورت ءسوندىرىلىپ، 263 اۆاريالىق-قۇتقارۋ جانە ىزدەستىرۋ جۇمىستارى جۇرگىزىلدى. بۇل تۋرالى تجم ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، وتكەن تاۋلىكتىڭ ىشىندە تجم قۇتقارۋشىلارى جەرگىلىكتى اتقارۋشى ورگاندارمەن، پوليتسيامەن، اسكەري قىزمەتشىلەرمەن جانە جول قىزمەتتەرىمەن بىرلەسىپ 887 ادامدى قۇتقاردى.
«اۋا-رايىنىڭ ناشارلاۋىنا بايلانىستى اۆتوكولىكتىڭ بارلىق تۇرلەرى ءۇشىن رەسپۋبليكالىق جانە وبلىستىق ماڭىزى بار اۆتوجولدارداعى قوزعالىسقا شەكتەۋ ەنگىزىلدى. سولتۇستىك قازاقستان وبلىسىندا «چەليابينسك-نوۆوسيبيرسك» رەسپۋبليكالىق ماڭىزى بار اۆتوجولىندا ديزەل وتىنىنىڭ قاتىپ قالۋى سالدارىنان تاجىكستاننان رەسەيگە بارا جاتقان جولاۋشىلار اۆتوبۋسى توقتاپ قالدى. 31 جولاۋشى جىلىتۋ پۋنكتىنە ورنالاستىرىلدى.
جامبىل وبلىسىندا «الماتى-تاشكەنت» اۆتوجولىنىڭ ۋچاسكەسىنىڭ جابىلۋىنا بايلانىستى اۆتوكولىكتەر كەپتەلىسى ورىن الدى. توقتاپ تۇرعان كولىك قۇرالدارىنان 392 ادام قۇتقارىلدى. ونىڭ 221-ءى تەمىرجول كولىگىمەن جونەلتىلدى. قالعان جولاۋشىلار ەكى جىلىتۋ پۋنكتىنە ورنالاستىرىلدى»، دەدى تجم ءباسپاسوز قىزمەتى.
سونىمەن قاتار، قورداي اۋدانىندا قارعا باتىپ قالعان اۆتوكولىكتەردەن 165 ادام قۇتقارىلىپ، جىلىتۋ پۋنكتتەرىنە جەتكىزىلگەن.
ال تۇركىستان وبلىسىندا تجد كۇشتەرى قار بوراسىنىنان 287 ادامدى قۇتقاردى، ولار ۇيلەرىنە، تەمىرجول ۆوكزالىنا جەتكىزىلدى نەمەسە جىلىتۋ پۋنكتتەرىنە ورنالاستىرىلدى.
الماتى، جامبىل، تۇركىستان، پاۆلودار وبلىستارىندا ىزدەستىرۋ-قۇتقارۋ جۇمىستارى ءساتتى اياقتالدى. قۇتقارۋشىلار، پوليتسيا قىزمەتكەرلەرى مەن جەرگىلىكتى تۇرعىنداردىڭ قۇتقارۋ توپتارى قولايسىز اۋا-رايىندا مال باعۋعا جانە مال ىزدەۋگە شىققان التى ادامدى تاپتى.
«قىستا توتەنشە جاعدايلاردى بولدىرماۋ ءۇشىن، ەڭ الدىمەن، اۋا-رايىنىڭ وزگەرۋىن، مەتەورولوگيالىق اقپاراتتى، اۋا-رايىنىڭ ناشارلاۋى تۋرالى ارنايى حابارلامالاردى، جولداردىڭ جابىلۋىن، داۋىلدى ەسكەرتۋلەردى ۇنەمى قاداعالاپ وتىرۋ قاجەت.
ايازدى كۇندەرى پەشتەردى قىزدىرۋ، جىلىتقىشتاردى پايدالانۋ، ەلەكتر جۇيەسىن جۇكتەۋ جانە باسقالار سالدارىنان ءورت قاۋپى ارتادى.
تجم داۋىلدى ەسكەرتۋ كەزەڭىندە الىس ساپارعا شىقپاۋعا، الىس قاشىقتىققا جاياۋ جۇرۋدەن باس تارتۋعا كەڭەس بەرەدى. ءورتتىڭ الدىن الۋ ءۇشىن جىلىتۋ جۇيەلەرىنىڭ، ەلەكتر جابدىقتارىنىڭ دۇرىستىعىن قاداعالاڭىزدار، پەشتەردى قىزدىرماڭىزدار جانە جوعارى قۋاتتى قۇرىلعىلاردى ءبىر ۋاقىتتا قوسۋ ارقىلى ەلەكتر جۇيەسىن شامادان تىس جۇكتەمەڭىزدەر»، دەپ حابارلادى تجم.
