Sońǵy úsh táýlik ishinde Tótenshe jaǵdaılar mınıstrliginiń kúshteri 1000-nan astam adamdy, onyń ishinde 86 balany qutqardy. 583 órt sóndirilip, 263 avarııalyq-qutqarý jáne izdestirý jumystary júrgizildi. Bul týraly TJM baspasóz qyzmeti málimdedi, dep habarlaıdy “Adyrna” ulttyq portaly.
Málimet boıynsha, ótken táýliktiń ishinde TJM qutqarýshylary jergilikti atqarýshy organdarmen, polıııamen, áskerı qyzmetshilermen jáne jol qyzmetterimen birlesip 887 adamdy qutqardy.
«Aýa-raıynyń nasharlaýyna baılanysty avtokóliktiń barlyq túrleri úshin respýblıkalyq jáne oblystyq mańyzy bar avtojoldardaǵy qozǵalysqa shekteý engizildi. Soltústik Qazaqstan oblysynda «Chelıabınsk-Novosıbırsk» respýblıkalyq mańyzy bar avtojolynda dızel otynynyń qatyp qalýy saldarynan Tájikstannan Reseıge bara jatqan jolaýshylar avtobýsy toqtap qaldy. 31 jolaýshy jylytý pýnktine ornalastyryldy.
Jambyl oblysynda «Almaty-Tashkent» avtojolynyń ýchaskesiniń jabylýyna baılanysty avtokólikter keptelisi oryn aldy. Toqtap turǵan kólik quraldarynan 392 adam qutqaryldy. Onyń 221-i temirjol kóligimen jóneltildi. Qalǵan jolaýshylar eki jylytý pýnktine ornalastyryldy», dedi TJM baspasóz qyzmeti.
Sonymen qatar, Qordaı aýdanynda qarǵa batyp qalǵan avtokólikterden 165 adam qutqarylyp, jylytý pýnktterine jetkizilgen.
Al Túrkistan oblysynda TJD kúshteri qar borasynynan 287 adamdy qutqardy, olar úılerine, temirjol vokzalyna jetkizildi nemese jylytý pýnktterine ornalastyryldy.
Almaty, Jambyl, Túrkistan, Pavlodar oblystarynda izdestirý-qutqarý jumystary sátti aıaqtaldy. Qutqarýshylar, polıııa qyzmetkerleri men jergilikti turǵyndardyń qutqarý toptary qolaısyz aýa-raıynda mal baǵýǵa jáne mal izdeýge shyqqan alty adamdy tapty.
«Qysta tótenshe jaǵdaılardy boldyrmaý úshin, eń aldymen, aýa-raıynyń ózgerýin, meteorologııalyq aqparatty, aýa-raıynyń nasharlaýy týraly arnaıy habarlamalardy, joldardyń jabylýyn, daýyldy eskertýlerdi únemi qadaǵalap otyrý qajet.
Aıazdy kúnderi peshterdi qyzdyrý, jylytqyshtardy paıdalaný, elektr júıesin júkteý jáne basqalar saldarynan órt qaýpi artady.
TJM daýyldy eskertý kezeńinde alys saparǵa shyqpaýǵa, alys qashyqtyqqa jaıaý júrýden bas tartýǵa keńes beredi. Órttiń aldyn alý úshin jylytý júıeleriniń, elektr jabdyqtarynyń durystyǵyn qadaǵalańyzdar, peshterdi qyzdyrmańyzdar jáne joǵary qýatty qurylǵylardy bir ýaqytta qosý arqyly elektr júıesin shamadan tys júktemeńizder», dep habarlady TJM.
