ساۋدا جانە ينتەگراتسيا ءمينيسترى ارمان شاققاليەۆ ەلىمىزدىڭ باسىم بولىگىنىڭ باسقا ۋاقىت بەلدەۋىنە كوشۋى تۋرالى پىكىرىمەن ءبولىستى. ونىڭ پايىمداۋىنشا، ساعاتتىق بەلدەۋدىڭ اسەرىنەن كوپتەگەن قازاقستاندىقتار قاتەرلى ىسىككە شالدىعىپ، ءوز-وزىنە قول جۇمسايدى، دەپ حابارلايدى "ادىرنا" ۇلتتىق پورتالى.
«عالىمدار ۋاقىت بەلدەۋلەرى ادامعا وتە ۇلكەن اسەر ەتەتىنىن اتاپ ءوتتى، ونىڭ ىشىندە سۋيتسيد پەن سۋيتسيدتىك ۇردىستەرگە قاتىستى ماسەلە دە بار. بۇگىندە بۇل ماسەلەگە ەكى وبلىستى – شىعىس قازاقستان وبلىسى مەن الماتىنى الاڭداتىپ وتىرعانىن جالپىلاپ، ايتا الامىز. قازىر كوبى: «ەندى ءبىر ساعاتقا ەرتە تۇرامىز با؟ ەندى جۇمىس ۋاقىتىمىز ۇزارا ما سوندا» دەگەن سۇراقتار قويۋدا، - دەدى ارمان شاققاليەۆ ktk.kz پورتالىنا.
قازىر ەلدى ءبىرتۇتاس ۋاقىت بەلدەۋىنە كوشىرۋ جوباسى قوعامدىق تالقىلاۋ ساتىسىندا. قۇجات قازىردىڭ وزىندە ازاماتتاردىڭ تەرىس رەاكتسياسىن تۋدىردى. بىراق، ءمينيستردىڭ ايتۋىنشا، بۇل ۇسىنىسقا قارسىلىق بىلدىرۋشىلەر ءوز ۇستانىمدارىن دالەلدەي المايدى. مينيسترلىكتىڭ قولىندا عالىمدار مەن ساراپشىلاردان قۇرالعان تۇتاس كوميسسيانىڭ قورىتىندىسى بار. قازىر قازاقستاندا ەكى ساعاتتىق بەلدەۋ بار، ونىڭ ءبىرى ەلىمىزدىڭ باتىسىندا. عالىمدار بۇل ازاماتتاردىڭ بيولوگيالىق ىرعاعى ءۇشىن ەڭ دۇرىس ەكەنىنە سەنىمدى. ەلدىڭ ءبىرتۇتاس ۋاقىت بەلدەۋىنە كوشۋى 1 ناۋرىزدا جۇزەگە اسۋى مۇمكىن.
ۆەدومستۆوارالىق جۇمىس توبىنىڭ وكىلدەرى بۇعان دەيىن ەلوردادا وتكەن بريفينگتە بىرىڭعاي ۋاقىت بەلدەۋىنە كوشۋ تۋرالى شەشىمدى جاريالاعان بولاتىن.
