قوستانايدا عيماراتتاعى جارىلىس سالدارىنان بولعان ۇيىندىدەن تاعى ءبىر ادام قۇتقارىلدى. قوستاناي وبلىسى توتەنشە جاعدايلار دەپارتامەنتىنىڭ باستىعى قايرات قاسىم قازىر ءۇيىندى استىندا كەمىندە ءۇش ادام بولۋى مۇمكىن ەكەنىن ايتتى، دەپ حابارلايدى “ادىرنا” ۇلتتىق پورتالى.
قۇتقارىلعان 40 جاستاعى ەر ادام، باس-مي جاراقاتىن العان. جۇمىس بەرۋشى ۇسىنعان تىزىمگە سايكەس ءۇيىندى استىندا كەمى ءۇش ادام بولۋى ىقتيمال.
«ءۇيىندى استىندا مەكەمەگە قاتىسى جوق ادامداردىڭ، ياعني مەكەمە كليەنتتەرىنىڭ بار-جوعى بەلگىسىز. سول سەبەپتى اپاتتىق-قۇتقارۋ جۇمىستارىن ءالى دە جالعاستىرامىز»، - دەدى قايرات قاسىم.
ونىڭ سوزىنشە، ىزدەستىرۋ جۇمىستارىنا عيمارات كونسترۋكتسياسى، سونداي-اق جارىلىستان قيراعان ءتۇرلى تەحنيكالار كەدەرگى كەلتىرۋدە. قاتتى ايازدىڭ جانە كونسترۋكتسيا قيراندىلارىنىڭ كوپ بولۋى ىزدەۋ-قۇتقارۋ جۇمىستارىن قيىنداتتى.
جالپى وقيعا ورنىنان بارلىعى 11 ادام اۋرۋحاناعا جاتقىزىلدى.
بۇعان دەيىن حابارلاعانىمىزداي، قوستاناي وبلىسىندا بۇگىن تۇستە ءبىر قاباتتى عيماراتتاعى گاز جارىلىس سالدارىنان 7 ادام ءۇيىندى استىندا قالعان. ءبىر ساعات بۇرىن ءۇيىندى استىنان ەكى ادام تابىلدى جانە ءبىر ادام قازا تاپقان. ىزدەستىرۋ جۇمىستارى جالعاسۋدا.
