يزرايل سىرتقى ىستەر ءمينيسترى ەلي كوەن بۇۇ باس حاتشىسى انتونيۋ گۋتەرريشتى سىنادى. ءمينيستردىڭ بۇل سىنى بۇۇ باس حاتشىسىنىڭ گازادا اتىستى توقتاتۋعا شاقىرۋىمەن بايلانىستى، دەپ حابارلايدى «ادىرنا» ۇلتتىق پورتالى.
بۇعان دەيىن گۋتەرريش بۇۇ قاۋىپسىزدىك كەڭەسىنىڭ توراعاسىنا جولداعان حاتىندا قاۋىپسىزدىك كەڭەسىن گازا سەكتورىنداعى گۋمانيتارلىق اپاتتىڭ الدىن الۋعا، سونىمەن بىرگە اتىستى توقتاتۋعا شاقىرعان. بۇعان جاۋاپ رەتىندە كوەن X الەۋمەتتىك جەلىسىندەگى بلوگىندا سىني جازبا جازدى.
«گۋتەرريشتىڭ بيلىكتە بولۋى الەم تىنىشتىعىنا قاۋىپ توندىرەدى. ونىڭ 99-باپتى ىسكە قوسۋ تۋرالى ءوتىنىشى جانە گازاداعى اتىستى توقتاتۋعا شاقىرۋى حاماس لاڭكەستىك ۇيىمىن قولداۋ جانە قارت ادامداردى ءولتىرۋدى، سابيلەردى ۇرلاۋدى جانە زورلاۋدى ماقۇلداۋ بولىپ تابىلادى. بۇكىل الەمدە بەيبىتشىلىكتى جاقتايتىن كەز كەلگەن ادام گازانى حاماستان ازات ەتۋدى قولداۋى كەرەك»، - دەپ جازدى يزرايل سىرتقى ىستەر مينيسترلىگىنىڭ باسشىسى.
بۇۇ جارعىسىنا سايكەس، 99-باپتا باس حاتشىنىڭ قاۋىپسىزدىك كەڭەسىنە حالىقارالىق بەيبىتشىلىك پەن قاۋىپسىزدىكتى ساقتاۋعا قاۋىپ ءتوندىرۋى مۇمكىن كەز كەلگەن ماسەلەلەر تۋرالى حابارلاۋعا قۇقىعى بار ەكەندىگى ايتىلعان.
ەستەرىڭىزگە سالا كەتەيىك، بۇعان دەيىن قازان ايىندا يزرايل بيلىگى گۋتەرريشتىڭ بۇۇ باس حاتشىسى قىزمەتىنەن كەتۋىن تالاپ ەتكەن بولاتىن.
«ادىرنا» ۇلتتىق پورتالى
