قر ءىىم قىلمىستىق-اتقارۋ جۇيەسى كوميتەتى وقۋ ورتالىعىنىڭ ون كۋرسانتى جەدەل رەسپيراتورلىق ۆيرۋستىق ينفەكتسيا دياگنوزىمەن پاۆلودارداعى اۋرۋحاناعا جەتكىزىلدى، دەپ حابارلايدى «ادىرنا» ۇلتتىق پورتالى.
بۇل اقپاراتتى پاۆلودار وبلىسىنىڭ دەنساۋلىق ساقتاۋ باسقارماسى راستادى. ۆيرۋسقا بايلانىستى وقۋ ورتالىعىنداعى العاشقى ستۋدەنت 29 قاراشادا اۋرۋحاناعا تۇسكەن. ال بۇگىندە بارلىعىنىڭ جاعدايى تۇراقتى.
بۇعان دەيىن اقتوبەدە ىشكى ىستەر مينيسترلىگى ينستيتۋتىنىڭ كۋرسانتى 21 جاستاعى قامبار بەيبول 21 قاراشادا وكپە ءتىنىنىڭ 80 پايىزدىق زاقىمدالۋى، ەكى جاقتى تولىق پنەۆمونيا دياگنوزىمەن جانساقتاۋ بولىمىنە ءتۇسىپ، قايتىس بولعان ەدى.
كۋرسانت 6 كۇن جانساقتاۋ بولىمىندە جاتىپ، قولدانىلعان شارالارعا قاراماستان 27 قاراشادا قايتىس بولدى.
وبلىستىق دەنساۋلىق ساقتاۋ باسقارماسى ولىمگە نەگىزگى اۋرۋ – تۋا بىتكەن جۇرەك اقاۋى سەبەپ بولعانىن ايتادى.
«ادىرنا» ۇلتتىق پورتالى
