30 قاراشادا JMMC بىرلەسكەن مينيسترلىك مونيتورينگ كوميتەتىنىڭ 51-ءشى وتىرىسى جانە بەينەكونفەرەنتسيا فورماتىندا وپەك+ 36-شى مينيسترلىك كەزدەسۋى ءوتتى. بۇل تۋرالى ەنەرگەتيكا مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
وتىرىستا 2023 جىلعى قىركۇيەك-قازان ايلارىندا ەلدەردىڭ كەلىسىم بويىنشا مىندەتتەمەلەردى ورىنداۋى جانە مۇناي نارىعىنداعى اعىمداعى احۋال تالقىلاندى.
مينيسترلىكتىڭ ايتۋىنشا، قازاقستان 2024 جىلعى 1 قاڭتاردان باستاپ 2024 جىلعى ناۋرىز ايىنىڭ سوڭىنا دەيىن وپەك+ قاتىسۋشى ەلدەرمەن بىرلەسىپ تاۋلىگىنە 82 مىڭ باررەلگە قوسىمشا ەرىكتى قىسقارتۋدى قابىلداعان.
«قازاقستاندا مۇناي ءوندىرۋ 2024 جىلدىڭ ناۋرىز ايىنىڭ سوڭىنا دەيىن تاۋلىگىنە 1 468 مىڭ باررەلدى قۇرايدى.
كەيىننەن نارىقتىڭ تۇراقتىلىعىن ساقتاۋ ماقساتىندا بۇل قوسىمشا قىسقارتىلعان كولەمدەر نارىقتىق جاعدايلارعا بايلانىستى بىرتىندەپ قالپىنا كەلتىرىلەتىن بولادى»،—دەلىنگەن حابارلامادا.
ايتا كەتەيىك، بۇل ەرىكتى قىسقارتۋدى ەلىمىز 2023 جىلعى ساۋىردە قابىلداعان ەدى.
ەنەرگەتيكا مينيسترلىگى قوسىمشا ەرىكتى قىسقارتۋ مۇناي نارىعىنىڭ تۇراقتىلىعى مەن تەپە-تەڭدىگىن ساقتاۋ ماقساتىندا وپەك+ ەلدەرىنىڭ ساقتىق شارالارىن كۇشەيتۋگە باعىتتالعانىن اتاپ ءوتتى.
