30 qarashada JMMC birlesken mınıstrlik monıtorıng komıtetiniń 51-shi otyrysy jáne beınekonferenııa formatynda OPEK+ 36-shy mınıstrlik kezdesýi ótti. Bul týraly Energetıka mınıstrliginiń baspasóz qyzmeti aıtty, dep habarlaıdy «Adyrna» tilshisi.
Otyrysta 2023 jylǵy qyrkúıek-qazan aılarynda elderdiń kelisim boıynsha mindettemelerdi oryndaýy jáne munaı naryǵyndaǵy aǵymdaǵy ahýal talqylandy.
Mınıstrliktiń aıtýynsha, Qazaqstan 2024 jylǵy 1 qańtardan bastap 2024 jylǵy naýryz aıynyń sońyna deıin OPEK+ qatysýshy eldermen birlesip táýligine 82 myń barrelge qosymsha erikti qysqartýdy qabyldaǵan.
«Qazaqstanda munaı óndirý 2024 jyldyń naýryz aıynyń sońyna deıin táýligine 1 468 myń barreldi quraıdy.
Keıinnen naryqtyń turaqtylyǵyn saqtaý maqsatynda bul qosymsha qysqartylǵan kólemder naryqtyq jaǵdaılarǵa baılanysty birtindep qalpyna keltiriletin bolady»,—delingen habarlamada.
Aıta keteıik, bul erikti qysqartýdy elimiz 2023 jylǵy sáýirde qabyldaǵan edi.
Energetıka mınıstrligi qosymsha erikti qysqartý munaı naryǵynyń turaqtylyǵy men tepe-teńdigin saqtaý maqsatynda OPEK+ elderiniń saqtyq sharalaryn kúsheıtýge baǵyttalǵanyn atap ótti.
