قازاقستان پالەستيناعا قوسىمشا گۋمانيتارلىق كومەك جىبەرەدى، - دەپ حابارلايدى "ادىرنا" پورتالى ۇكىمەتتىڭ ءباسپاسوز قىزمەتىنە سىلتەمە جاساپ.
"مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس قازاقستان پالەستيناعا قوسىمشا گۋمانيتارلىق كومەك كورسەتەدى. بۇل ماسەلە قر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن وتكەن ۇكىمەتتىك كوميسسيانىڭ وتىرىسىندا تالقىلاندى", - دەپ حابارلايدى ۇكىمەت ءباسپاسوزى.
گۋمانيتارلىق كومەككە سالماعى 38 توننادان اساتىن ازىق-تۇلىك، توسەك-ورىن جابدىقتارى، ءدارى-دارمەك جانە مەديتسينالىق بۇيىمدار كىرەدى.
"جۇك جاقىن ارادا اۋە ارقىلى جونەلتىلەدى. قازاقستاننىڭ قولداۋى گازا سەكتورىنداعى اپاتتى گۋمانيتارلىق جاعدايعا بايلانىستى پالەستيناعا كومەكتەسۋگە باعىتتالعان", - دەلىنگەن ۇكىمەتتىڭ ءباسپاسوز قىزمەتى تاراتقان حابارلامادا.
بۇعان دەيىن قازاقستان پالەستينا حالقىنا ءبىر ميلليون دوللار كولەمىندە گۋمانيتارلىق كومەك كورسەتكەن. سىرتقى ىستەر مينيسترلىگى قازاقستان ۇكىمەتى پالەستينا حالقى ءۇشىن بولگەن قاراجات بۇۇ-نىڭ تاياۋ شىعىس جونىندەگى اگەنتتىگىنىڭ ەسەپشوتىنا اۋدارىلعانىن حابارلادى.
قاراشا ايىنىڭ باسىندا قاسىم-جومارت توقاەۆ پالەستينا حالقىنا گۋمانيتارلىق كومەك كورسەتۋ تۋرالى شەشىمىن جاريالادى.
"سولتۇستىكتە رەسەي مەن ۋكراينا، تاياۋ شىعىستا - يزرايل مەن پالەستينا اراسىنداعى قاقتىعىس جالعاسۋدا. اۋعانستانداعى تۇراقسىزدىق جالعاسۋدا. باتىستا زاڭسىز كوشى-قون ماسەلەسى ۋشىعىپ بارادى. بۇگىندە گازا سەكتورىنداعى بەيبىت تۇرعىندار، اسىرەسە بالالار ادىلەتسىز جاپا شەگۋدە. قارت ادامدار قاقتىعىستىڭ قۇربانىنا اينالۋدا. ولاردىڭ قاۋىپسىزدىگىن قامتاماسىز ەتۋ باستى مىندەت. وسىعان بايلانىستى مەن پالەستينا حالقىنا 1 ميلليون دوللار كولەمىندە گۋمانيتارلىق كومەك كورسەتۋ تۋرالى شەشىم قابىلدادىم»، - دەدى توقاەۆ.
ەسكە سالايىق، 7 قازان كۇنى تاڭەرتەڭ يزرايل گازا سەكتورىنان جاپپاي زىمىراندىق شابۋىلعا ۇشىراعانىن حابارلاعان بولاتىن. پالەستينالىق حاماس قوزعالىسىنىڭ ونداعان جاۋىنگەرى ەلدىڭ شەكارالاس ايماقتارىنا كىردى. يزرايل رەسمي تۇردە سوعىس جاعدايىن جاريالادى.
26 قازاندا حاماس ءيزرايلدىڭ گازا سەكتورىن باسىپ العانىن حابارلادى. 28 قازاندا يزرايل گازا سەكتورىندا «سوعىستىڭ جاڭا كەزەڭىنە» وتكەنىن جاريالادى.
كەلىسىم شارتتارىنا سايكەس، وتكەن جۇمادان باستاپ كۇن سايىن حاماس 13 يزرايلدىك كەپىلگە الىنعان ايەلدەر مەن بالالاردى، ال يزرايل 39 پالەستينالىق تۇتقىندى، ونىڭ ىشىندە ايەلدەر مەن 19 جاسقا تولماعان جاستاردى تۇرمەلەرىنەن بوساتقاندارىن ايتتى.
