Qazaqstan Palestinaǧa qosymşa gumanitarlyq kömek jıberedı, - dep habarlaidy "Adyrna" portaly ükımettıŋ baspasöz qyzmetıne sılteme jasap.
"Memleket basşysy Qasym-Jomart Toqaevtyŋ tapsyrmasyna säikes Qazaqstan Palestinaǧa qosymşa gumanitarlyq kömek körsetedı. Būl mäsele QR Premer-Ministrınıŋ bırınşı orynbasary Roman Skliardyŋ töraǧalyǧymen ötken ükımettık komissiianyŋ otyrysynda talqylandy", - dep habarlaidy ükımet baspasözı.
Gumanitarlyq kömekke salmaǧy 38 tonnadan asatyn azyq-tülık, tösek-oryn jabdyqtary, därı-därmek jäne medisinalyq būiymdar kıredı.
"Jük jaqyn arada äue arqyly jöneltıledı. Qazaqstannyŋ qoldauy Gaza sektoryndaǧy apatty gumanitarlyq jaǧdaiǧa bailanysty Palestinaǧa kömektesuge baǧyttalǧan", - delıngen ükımettıŋ baspasöz qyzmetı taratqan habarlamada.
Būǧan deiın Qazaqstan Palestina halqyna bır million dollar kölemınde gumanitarlyq kömek körsetken. Syrtqy ıster ministrlıgı Qazaqstan ükımetı Palestina halqy üşın bölgen qarajat BŪŪ-nyŋ Taiau Şyǧys jönındegı agenttıgınıŋ esepşotyna audarylǧanyn habarlady.
Qaraşa aiynyŋ basynda Qasym-Jomart Toqaev Palestina halqyna gumanitarlyq kömek körsetu turaly şeşımın jariialady.
"Soltüstıkte Resei men Ukraina, Taiau Şyǧysta - İzrail men Palestina arasyndaǧy qaqtyǧys jalǧasuda. Auǧanstandaǧy tūraqsyzdyq jalǧasuda. Batysta zaŋsyz köşı-qon mäselesı uşyǧyp barady. Bügınde Gaza sektoryndaǧy beibıt tūrǧyndar, äsırese balalar ädıletsız japa şegude. Qart adamdar qaqtyǧystyŋ qūrbanyna ainaluda. Olardyŋ qauıpsızdıgın qamtamasyz etu basty mındet. Osyǧan bailanysty men Palestina halqyna 1 million dollar kölemınde gumanitarlyq kömek körsetu turaly şeşım qabyldadym», - dedı Toqaev.
Eske salaiyq, 7 qazan künı taŋerteŋ İzrail Gaza sektorynan jappai zymyrandyq şabuylǧa ūşyraǧanyn habarlaǧan bolatyn. Palestinalyq Hamas qozǧalysynyŋ ondaǧan jauyngerı eldıŋ şekaralas aimaqtaryna kırdı. İzrail resmi türde soǧys jaǧdaiyn jariialady.
26 qazanda Hamas İzraildıŋ Gaza sektoryn basyp alǧanyn habarlady. 28 qazanda İzrail Gaza sektorynda «soǧystyŋ jaŋa kezeŋıne» ötkenın jariialady.
Kelısım şarttaryna säikes, ötken jūmadan bastap kün saiyn Hamas 13 izraildık kepılge alynǧan äielder men balalardy, al İzrail 39 palestinalyq tūtqyndy, onyŋ ışınde äielder men 19 jasqa tolmaǧan jastardy türmelerınen bosatqandaryn aitty.
Ūqsas jaŋalyqtar
