تۇركىستان وبلىسىنا جۇمىس ساپارىمەن كەلگەن قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ايماق باسشىسى مەن اۋدان، قالا اكىمدەرىنىڭ الەۋمەتتىك جەلىدەگى جەكە پاراقشالارىمەن تانىستى، دەپ حابارلايدى قازاقپارات ءتىلشىسى.
اگەنتتىك توراعاسى پاراقشالارداعى حالىقتىڭ ساۋالى مەن ۋاقىتىلى بەرىلگەن جاۋاپتاردى كورىپ، كەرى بايلانىسقا جوعارى باعا بەردى. وبلىس اكىمدىگىنە قاراستى الەۋمەتتىك پاراقشالاردىڭ اشىقتىعىن اتاپ ءوتتى. اليك شپەكباەۆ سونىمەن قاتار وبلىس اكىمدىگى جانىنان قۇرىلعان جوبالىق كەڭسەنىڭ جۇمىسىمەن تانىستى. كەڭسەنىڭ نەگىزگى ماقساتى مەن باعىت-باعدارى جايلى تۇركىستان وبلىسىنىڭ اكىمى ومىرزاق شوكەەۆ ايتىپ بەردى. اتالعان كەڭسە 5 نەگىزگى بازالىق باعىتتا، ياعني ينفراقۇرىلىمنىڭ دامۋى، ادامي كاپيتال، كاسىپكەرلىك جانە يندۋستريا، اگروونەركاسىپ كەشەنى جانە مەملەكەتتىك سەكتور، مەملەكەتتىك قىزمەت كورسەتۋ مەن قاۋىپسىزدىك نەگىزىندە جۇمىس ىستەيدى. وندا كەلۋشىلەر اتالعان 5 باعىت بويىنشا ءوز جوبالارىن ۇسىنادى، ال ۇسىنىلعان ءتيىمدى جوبالار رۋحاني مەكەندى دامىتۋ ءۇشىن قولدانىلادى. بۇگىندە 1300-دەن اسا جوبا جينالىپ، قارالۋ ۇستىندە.
