جامبىل وبلىسىندا ءبىلىم ءبولىمىنىڭ باسشىلارى 12 جاسار وقۋشىنىڭ جۇكتىلىگىن ءبىر جىل بويى جاسىرىپ كەلگەن. بۇل تۋرالى 31-ارنا ينفورمبيۋرو جاڭالىقتار باعدارلاماسى جاريالادى، دەپ حابارلايدى “ادىرنا” ۇلتتىق پورتالى.
مەكتەپ اكىمشىلىگى جاڭاتاس قالاسىنداعى جاعدايدى جاسىرۋ ءۇشىن قىزدىڭ اناسىنا ەسكەرتپەي، وعان تۇسىك جاساتقان. قازىر 7-سىنىپتاعى جاسوسپىرىمگە ازعىندىق جاسادى دەگەن كۇدىكپەن اۋداندىق ءماسليحات دەپۋتاتىنىڭ كۇيەۋى قاماۋعا الىندى. پوليتسيا قىلمىستى دەر كەزىندە حابارلاماعان ءبىلىم سالاسىنىڭ قىزمەتكەرلەرىنە قاتىستى ءىس قوزعادى.
12 جاسار قىزدى ۇزاق ۋاقىت 55 جاستاعى ەر ادام جىنىستىق قارىم-قاتىناسقا تارتقان. تەلەفون سىيلاپ، الداپ، وقۋشىعا ويىنا كەلگەنىن ىستەگەن كورىنەدى. اقىرى جۇكتى بولىپ، اناسىنا بار شىندىقتى ايتۋعا بەل بۋعان. قالتاسى قالىڭ كۇدىكتى قىزدى قورقىتىپ، ەشكىمگە ايتپاۋىن تالاپ ەتكەن.
كەرەك جوق، ونىڭ بايلانىسى مىقتى. ايەلى - دەپۋتات. بالاباقشادا مەڭگەرۋشى بولىپ ىستەيدى. ماعان قىزىم جۇكتى ەكەنىن تەك جاڭا جىلدىڭ قارساڭىندا ايتتى. جۇكتىلىك مەرزىمى شامامەن التى ايلىق،- دەدى اناسى ءماريام سمادياروۆا.
جالعىزباستى ايەل قىزىنىڭ جۇكتىلىگىن مەكتەپ باسشىلارى دا جاسىرۋعا تىرىسقانىن ايتادى. قىز مەكتەپ-ينتەرناتتا جاتىپ وقىعان. جۇكتىلىكتىڭ التى ايلىعىندا وقۋشىنى ءبىلىم وشاعىنىڭ قىزمەتكەرلەرى جاڭاتاستان قاراتاۋ قالاسىنا الىپ كەتكەن.
ماعان تۇسىك جاساتاتىنىن ايتقان جوق. ولار تۇسىكتەن بۇرىن تولعاق شاقىراتىن ءدارى بەرگەن. مەن بىلمەدىم. تەك تۇندە قىزىم تۇسىك جاساتقىزعانى تۋرالى حات جازىپ جىبەرىپتى. ءسۇتى تاراۋى ءۇشىن ومىراۋىن شارفپەن بۋىپ، ۇيگە اكەلىپ تاستادى. بىراق بۇل تۇسىك ەشقانداي قۇزىرلى ورگاندارىندا تىركەلمەگەن. جاسىرىن تۇسىك جاساتۋدىڭ جولىن تاپقاندار جەكە گينەكولوگ جالداعان ەكەن.
ءبىلىم ءبولىمىنىڭ باسشىسى كۇدىكتى بالاباقشادا كۇزەتشى بولىپ ىستەگەنىن ايتادى.
“قازىر تەرگەۋ امالدارى ءجۇرىپ جاتىر. سوندىقتان ەشنارسە ايتا المايمىن. وقيعا بولعانى راس. ايگويلەك مەملەكەتتىك بالاباقشاسىندا كۇزەتشى بولىپ جۇمىس ىستەگەن. قازىر پوليتسيا دەپارتامەنتى بۇل ايتىلعانداردى تەرگەۋمەن دالەلدەنگەنىن جەتكىزدى. جەتىنشى سىنىپتاعى جەتكىنشەككە ازعىندىق جاساعان كۇدىكتى قاماۋعا الىندى. سونداي-اق وسى ىسكە قاتىسى بار ءبىلىم ءبولىمىنىڭ قىزمەتكەرلەرىنىڭ ۇستىنەن قىلمىستىق ءىس قوزعالعان”، – دەدى سارىسۋ اۋدانى ءبىلىم ءبولىمىنىڭ باسشىسى ءىلياس بايماعامبەتوۆ.
“تەرگەۋ بارىسىندا جىنىستىق قاتىناس سالدارىنان 2022 جىلى جۇكتى بولعانى انىقتالدى. الايدا جۇكتىلىك دەرەگى مەكتەپ باسشىلىعىمەن جاسىرىلعان، ءتيىستى ورگاندارعا حابارلاۋسىز تۇسىك جاسالعان. ايىپتالۋشىنىڭ كىناسى دالەلدەنىپ، قاماققا الىندى. ءىس سوتقا جىبەرىلدى. مەكتەپ باسشىلىعىنا قاتىستى قك 434 بابى “قىلمىس تۋرالى حابارلاماۋ” تۋرالى ءىس تىركەلدى”، – دەپ مالىمدەدى جامبىل وبلىسى پوليتسيا دەپارتامەنتى باستىعىنىڭ ورىنباسارى الماز سالاماتوۆ.
