اۋا رايىنىڭ ناشارلاۋىنا جانە كوكتايعاق پەن كۇشتى داۋىلعا بايلانىستى استانادان شىعاتىن بارلىق جولدار جابىلدى، - دەپ حابارلايدى "ادىرنا" ۇلتتىق پورتالى.
«قازاۆتوجول» سايتىنىڭ حابارلاۋىنشا، استانادان جانە استاناعا باراتىن بارلىق باعىتتار بويىنشا كولىكتەردىڭ بارلىق تۇرلەرى ءۇشىن قوزعالىسقا شەكتەۋلەر ەنگىزىلگەن.
ەلوردالىق «City Transportation Systems» كولىك كومپانياسى قالا ماڭىنداعى بارلىق باعىتتاردى ۋاقىتشا توقتاتقانىن حابارلادى.
استانادا جاڭبىر جاۋىپ، كەيىن قاتتى جەل تۇرىپ، كوشەلەردە كوكتايعاق بولدى. توتەنشە جاعدايلار دەپارتامەنتى مەن اكىمدىك قالا تۇرعىندارىنا ەسكەرتۋ جاسادى.
توتەنشە قولايسىز اۋا رايى جاعدايىنا بايلانىستى استانالىقتار مەن ەلوردا قوناقتارىنان جول-كولىك وقيعالارىن بولدىرماۋ ءۇشىن كوشەدە قوزعالۋ كەزىندە وتە مۇقيات جانە ساق بولۋدى سۇرايمىز.
قازگيدرومەتتىڭ مالىمەتىنشە، بۇگىن، 22 قاراشادا استانادا ەكپىنى سەكۋندىنا 16-21 مەترگە جەتەتىن جەل سوعادى. 23 قاراشادا دا كوكتايعاق كۇتىلۋدە، بىراق جەلدىڭ ەكپىنى كەي جەرلەردە سەكۋندىنا 23-28 مەترگە دەيىن كۇشەيەدى.
قۇتقارۋشىلار ازاماتتاردان كوشەدە اباي بولۋدى، توتەنشە جاعداي ورىن العان جاعدايدا 112 تەلەفونى ارقىلى جەدەل جاردەم شاقىرۋدى سۇرايدى.
