Aýa raıynyń nasharlaýyna jáne kóktaıǵaq pen kúshti daýylǵa baılanysty Astanadan shyǵatyn barlyq joldar jabyldy, - dep habarlaıdy "Adyrna" ulttyq portaly.
«QazAvtoJol» saıtynyń habarlaýynsha, Astanadan jáne Astanaǵa baratyn barlyq baǵyttar boıynsha kólikterdiń barlyq túrleri úshin qozǵalysqa shekteýler engizilgen.
Elordalyq «City Transportation Systems» kólik kompanııasy qala mańyndaǵy barlyq baǵyttardy ýaqytsha toqtatqanyn habarlady.
Astanada jańbyr jaýyp, keıin qatty jel turyp, kóshelerde kóktaıǵaq boldy. Tótenshe jaǵdaılar departamenti men ákimdik qala turǵyndaryna eskertý jasady.
Tótenshe qolaısyz aýa raıy jaǵdaıyna baılanysty astanalyqtar men elorda qonaqtarynan jol-kólik oqıǵalaryn boldyrmaý úshin kóshede qozǵalý kezinde óte muqııat jáne saq bolýdy suraımyz.
Qazgıdromettiń málimetinshe, búgin, 22 qarashada Astanada ekpini sekýndyna 16-21 metrge jetetin jel soǵady. 23 qarashada da kóktaıǵaq kútilýde, biraq jeldiń ekpini keı jerlerde sekýndyna 23-28 metrge deıin kúsheıedi.
Qutqarýshylar azamattardan kóshede abaı bolýdy, tótenshe jaǵdaı oryn alǵan jaǵdaıda 112 telefony arqyly jedel járdem shaqyrýdy suraıdy.
