بالانى 6 جاستان مەكتەپكە بەرۋ - مىندەتتى

2075
Adyrna.kz Telegram

قر ءبىلىم جانە عىلىم ءمينيسترى كۇلاش ءشامشيدينوۆا 6 جاسقا تولعان بالالاردىڭ بالاباقشادان شىعارىلۋىنا قاتىستى تۇسىنىك بەردى، دەپ جازادى قازاقپارات.

«زاڭدا 6 جاستان باستاپ بالانىڭ مەكتەپتە ءبىلىم الاتىندىعى ناقتى جازىلعان. سوندىقتان اتا-انالار 6 جاستان باستاپ بالالارىن مەكتەپكە بەرگەنى دۇرىس. جالپى، بۇل زاڭدا جازىلعاندىقتان، مىندەتتى سانالادى. بىراق، ءبىز ءاربىر ادامنىڭ دەربەس ەكەندىگىن بىلەمىز. وسى تۇرعىدان العاندا، اتا-انالاردىڭ وزدەرى دە بالاسىنىڭ قانشالىقتى مەكتەپكە بارۋعا دايىن ەكەندىگىن قاراۋى كەرەك شىعار. بىراق، بۇل، اتا-اناسى قالاسا، بالاسىن مەكتەپكە جىبەرمەيدى دەگەن ءسوز ەمەس. وزدەرىڭىز دە بىلەسىزدەر بۇل ماسەلە زاڭعا تاياۋدا عانا ەنگىزىلدى. سول سەبەپتى مينيسترلىك قازىرگى ۋاقىتتا وعان مونيتورينگ جۇرگىزىپ وتىر»، - دەدى كۇلاش ءشامشيدينوۆا ۇكىمەت وتىرىسىنان كەيىن باق وكىلدەرىنىڭ ساۋالىنا وراي.

ونىڭ اتاپ وتۋىنشە، بالاباقشالاردىڭ جانىندا مەكتەپكە دايىندىق تەگىن جۇرگىزىلەدى. «ەگەر بالا مەكتەپكە دايىندىقتى، ماسەلەن، 5 جاس 8 ايىندا باستاسا، وندا ول قالاي بولعاندادا مەكتەپكە دەيىنگى ۇيىمداعى دايىندىق باعدارلاماسىن اياقتاۋى ءتيىس. ارينە، بۇل رەتتە باسقا ماسەلە بار. ەگەر تەكسەرۋشى ۇيىم كەلسە، وندا ونىڭ تاراپىنان «6 جاسقا تولعان بالا نەلىكتەن بالاباقشادا ءجۇر» دەگەن ساۋال تۋىندايدى. سوندىقتان قازىر بۇل ماسەلەنى شەشۋدىڭ زاڭدى جولىن قاراستىرىپ جاتىرمىز»، - دەدى ءبىلىم ءمينيسترى.

پىكىرلەر