QR Bilim jáne ǵylym mınıstri Kúlásh Shámshıdınova 6 jasqa tolǵan balalardyń balabaqshadan shyǵarylýyna qatysty túsinik berdi, dep jazady QazAqparat.
«Zańda 6 jastan bastap balanyń mektepte bilim alatyndyǵy naqty jazylǵan. Sondyqtan ata-analar 6 jastan bastap balalaryn mektepke bergeni durys. Jalpy, bul zańda jazylǵandyqtan, mindetti sanalady. Biraq, biz árbir adamnyń derbes ekendigin bilemiz. Osy turǵydan alǵanda, ata-analardyń ózderi de balasynyń qanshalyqty mektepke barýǵa daıyn ekendigin qaraýy kerek shyǵar. Biraq, bul, ata-anasy qalasa, balasyn mektepke jibermeıdi degen sóz emes. Ózderińiz de bilesizder bul másele zańǵa taıaýda ǵana engizildi. Sol sebepti mınıstrlik qazirgi ýaqytta oǵan monıtorıng júrgizip otyr», - dedi Kúlásh Shámshıdınova Úkimet otyrysynan keıin BAQ ókilderiniń saýalyna oraı.
Onyń atap ótýinshe, balabaqshalardyń janynda mektepke daıyndyq tegin júrgiziledi. «Eger bala mektepke daıyndyqty, máselen, 5 jas 8 aıynda bastasa, onda ol qalaı bolǵandada mektepke deıingi uıymdaǵy daıyndyq baǵdarlamasyn aıaqtaýy tıis. Árıne, bul rette basqa másele bar. Eger tekserýshi uıym kelse, onda onyń tarapynan «6 jasqa tolǵan bala nelikten balabaqshada júr» degen saýal týyndaıdy. Sondyqtan qazir bul máseleni sheshýdiń zańdy jolyn qarastyryp jatyrmyz», - dedi Bilim mınıstri.
